Author Information
عجلات الزمن في الغربة : فتحية محمود
دور يا زمان بالله دورْ
دور يا زمان بالله دورْ
دور وخلّي عجلاتك تمـرْ
ما تخلي وراكَ زول
ان كان غني
و ان من زمان عايشَ الصبْر
ما انت اصلك شيء عنيدْ
وكل قراراتك حديدْ
لا بترحم زول عزيزْ
ولا نهاياتك تسرْ
ـــــ
ونحنَ يا زمن السرور ...
قضينا كل هذا العمرْ
في غربةٍ أحلاها مُرْ
ما فيها شيتاً نذكروا
الا الألم و الطعم مُرْ
و هاجرنا من دارنا
وكان لينا العُذُرْ
و جينا من كل البلادْ
لأرض الزيت و الخير و التمر
و ركبنا فوق طيراً كبير كُبْرَ الامرْ
و نسينا اهلاً لينا
لازمين السكات ولايكينَ الصبُرْ
و خلّينا اخواناً حُنان
شوفتهم .. تَجْبر الخاطرْ
و للمحزون تَسُرْ
*************
و في ديار الغُربة
لقينا جماعةً لينا
بايعين العمر ..!!
بي حفنة من هللات
و ناسين الأمُرْ
و اتلمينا من كلْ صوب
و كونّا مجموعةً كُتُرْ
و بقينا اجناساً كُتار
وحدين صُفر وحدين خُدر
و جينا من كل الفجاج
بقينا عُزازْ
جمعنا قروش .. عملنا كروش
و اتبحبحنا .. و اتمسحنا
بالفازلين و انواعو
و اتعشينا من هارديز وأتباعو
و صار الكبير فينا
قليل فهمو وطويل باعو
و نسينا بلدنا و اوجاعو
و خلينا و طنّا في ضياعو
و رضينا بي واقعنا وصداعو
*************
كفاية علينا
عيشة الغربة ما أقساها
جاتنا (الممحوقة ) شلناها
و بيوتنا السمحة فرشناها
بالموكيت و السجاد
يا سيدي زيّناها و بي اجمل الزهور
يا سيدي عطّرناها
************
و قلنا كدِي؟؟
و دخلنا السوق
صرفنا..صرفنا ما خلينا كبايه
وما خلينا دهبايه
و ما خلينا هدمايه
و مرينا بالجزار
و هاك يا لحمة شوّاية
و هاك يا كبدة عشّاية
تحت الكهربا الضوّايه
و لمتين با ربي نحن عمايا
محتاجين كتير !!!
لي أُماً تكون وصّايه
و محتاجين كمان
لي شيخاً جليل
في إيدوا قلم ودوايا
يكتبلنا البخرات
و يدينا منو محايه
ومحتاجين شديد
لي وطناً حبيب
يبقالنا دار وحمايه
و فوق كل الجميع
رباً كريم تجينا منو هدايا
ونقوم ( نَهِج )ْ من دار العرب
و نخلِّي الديار (حاحايا)
************
انها قصيدة معبرة للغاية وتحكي واقعاً يعيشه كثير من السودانيين في المهجر . لقد أعجبني شعر الأخت الشاعرة جداً .ولكم تحياتي .