Author Information
ONTGINNING
Die heelal is ‘n allemintige lokaal
Wat ek soms soetjies bly betree
Met my twee oë … prismas
Vir die somerwarm son
Kom knipper glans uit opdrifsel en kluit
Laat die begeerte steenlae ontsluit
Koue materie kom met ‘n blote kyk
Tot lewe
Vergange ruimrommel word vonds:
Klippies word skitterend weer jaspis
Topaas smarag en ametis;
Die maan ‘n koelwit pêrel
Geketting teen die oggendstond
Die sterre rol ek in my hand:
Sorteer dit … soek die Diamant
Hier naby en dan weer daar ver
Vind in my hart die Môrester
Ek keer traag na die aarde terug …
Die grys skelet van die gestorwe Duif
Word weer in sy Witveer beklee
Om vry deur Melkweë te vlerk
Stuur saam met my die blou Saffier:
‘n Nuwe Hemelruim
En om my hart die kraalwerk
Van sy opgekropte
Koer
