Author Information
آه م الجميلات .. عبدالله عبداللطيف
Folder:
من الشعر الغنائي آه م الجميلات .. الحسناوات
آه يا ويلي آه
آه من سحر لابتسامات
آه يا قلبي آه
ف حنانهم .. ف جمالهم
أنا قلبي تاه
زهرة جميلة كاسي عودها
أجمل فستان
الفل طارح ف خدودها
ورد البستان
النظرة الساحرة ف شرودها
بتقول ألحان
وشفايف مرسومه حدودها
بفن وإتقان
وبقول وبغني علي عودها
الله .. الله
أنا قلبي تاه .. آه يا قلبي آه
ودي فله جميله في خميله
مليانه ريحان
رموشها خطيره وطويله
شكلها فتان
وأنا قلبي سلم ولا حيله
ولا قوة كمان
ضحكتها بريئة وجميله
وف كل آوان
وعينيها جميلة وكحيله
سبحان الله
أنا قلبي تاه .. آه يا قلبي آه
شوفو الياسمينه بتتمخطر
علي شط النيل
علي قلبي الطيب تتشطر
وتقول مواويل
ف عينيها يا ناس أدوب وأسكر
وأرقص وأميل
والجسم جميل تقول مرمر
والشعر طويل
وبغني وأقول كمان أكتر
سبحان الله
أنا قلبي تاه .. آه يا قلبي آه
بستانك مليان يا جنايني
حب وأزهار
جمالهم بالحق فتني
ولفت الأنظار
والحسن دا كله محيرني
وإزاي أختار
وحياتك قولي وفهمني
سر الأسرار
وأنا لسه بقول وبغني
سبحان الله
أنا قلبي تاه .. آه يا قلبي آه
