معليش يا عيد هاشم صديق
معليش يا عيد هاشم صديق
Folder:
هاشم صديق معليش يا عيد
هاشم صديق
يا عيد معليش..
سبحان الله
ناس يا عيد
بِتْضَحي خروف
و ناس عدمانه
كفاها الشوف
و ناس تعبانه
تفتش تيس
يا عيد معليش..
الناس الرؤسا..
الناس الوزرا..
الناس الخُلفا
أي معالي..
حاشية والي
الناس المارقه ..
الناس الخاشه
ولاد السُلطه..
شمار البوسطه
الناس الحاشّه
قاشره وغاشّه.
ملوك السف..
وحتى العُوَرا الكانو الرف
قرود الشاشه
الجَهَلا الباعو
عشان العيش..
ديل يا عيد
الصف الأول..
ونحنا تملي
الصف الطيش
سبحان الله..
ناس مزرورة
تَمِش شقيش؟!
لا خروف مربوط..
لا ربّه تجوط
لا ضلعه وشيّه..
لا كبده بشطه هشّه ونيّه
لا راس بقرون
مجدوع في خيش
لا كراع..
لا باع..
لا عتوت..
لا تيس.
ورونا قِرش
بي كم مليم
ومتين حنفارق
أكل النيم
واسيادنا طناش
حايمين في الحله..
وشوشنا غباش
دموعنا ترقرق
وبكره طشاش
وناس يا عيد ..
خروفهم جاي
«بكامري» «الهاى»
يضحك وهاش
ملوّن صوفو..
تقول بس سيدو
كمان نقّاش..
برسيم نعناع
وقرونو ضراع
حنكوش ومسمسم..
تقول حيغني بنغمة باااع
