الفوارس والكوارث شعر : هاشم صديق
الفوارس والكوارث شعر : هاشم صديق
الفوارس والكوارث
شعر : هاشم صديق
ياتو ورقاً إتمضا
وكان دوانا من الأذى ؟!
ياتو ظلماً إتنسى
بس عشان مكاً ضحك
أوعشان سيداً عفا؟!
............
ياتو خطباً في إضينَا
جمّلت في عيونّا شينة ؟
وياتو تلفاز
ياتو رادي
ياتو راوي
ياتو زينة
لبّست عريانّا توب
وبدلت طعم ( السخينة) ؟!
وياتو حلماً في عصورنا
ما صبح باللّت عجينة؟!
وياتو مركب في بحرنا
طاش صوابها
وهدهدت أعصابا مينا؟!
وياتو راجلاً بالبشارة
جانا من أقصا المدينة
و بـ( البشاورة)
كان مسح سبورة
الرحلة الحزينة
وكان غرس في الليل
بشارات الرتينة
وشفانا من جوع أو حفا؟!
..............
ياتو مسرح إبتدا
وأسيادنا ماكانوا الفوارس
ونحنا كومبارس الحوادث؟!
وياتوا والي في المنابر
ما خطب فينا ونهر
مليون شهر
ونحنا قاعدين في البنابر
قدامو زي شفع مدارس؟!
وياتو دستور
ماصبح في راسنا قمبور
وياتو إعلان أو بيان
ما إنغرس في حلوقنا أحزان ؟!
وياتوا لحما للعضام
يوماً رجع
وياتو آذان
ياعسس ( مالطة) انسمع ؟!
وياتوا صفاً إنقسم
وعاد يتمم وانجمع؟!
وياتو رتبة وياتو قبة
ما بقت في اللفّة
كُبه
وياتو صوتاً من وجع
دمدم هتف
ما انقطع حبلو ونزف
وبالأوامر والكوامر إتنفا ؟!
.............
أحلام بتنقح
طول دبابيس الليالي
ولمّا جمر الدنيا يصبح
وما انجبر
يا دنيا خاتر
لسه لافانا المواجع
والصفافير والمواتر .
سيداً مرق ،
سيداً رجع ،
مكّاً دخل ،
مكاً طلع ،
شيخاً لبد ،
شيخاً نبل ،
سيفاً ضحك ،
كشَّر كتل ،
ورقاً جبل ،
ورقاَ سَهَل ،
صدقاً أفل ،
كضباً لمع ،
صنماً وقف ،
صنماً وقع،
كفاً عَصَر،
كفاً قلع .
...........
والأماني
لسه في حال (الصواني)
لقمة طاعمة
وبي كرامة
حبة إحساس بي السلامة
رجعة لي قيف الشهامة
مرقة من عَصْر القيامة
فرحة ما تكمل ندامة
لاها قصراً أو دواير
لاها بستان أو مناظر
لاها ( مول)
في ( وادي شنقول)
وكبري طاير
في ( القماير)
لاها أموال في الخفا.
.............
أعفونا من كتر التحالف
والتخالف
والشراكة
والشياكة
والمواثيق
والتواثيق
والورق.
كم مرة أذنا الفجُر
قبال نفيق
شَفَقو إنسرق
كم مرة بشّرتو
الخشوم
أكلت عديل
مُر الصفقْ
كم مرة جربنا البيان
كم مرة جبناكم عَيان
نِشف البلد
قلبو إنحرق
............
الشعب وين يا مؤمنين
ودستوروا
في حَلة إنسلق؟!
و ( القسمة) في ثروة منو
والشعب بي جوعو إنشرق
و(النسبة) في سلطة منو
و( سكرنا زاد)
( بالنسبة)
في الدم إنطلق
............
إنتو الفوارس والمكوك
الداير يبيع تدوهوا
( في جاهكم يلوك)
واللسه ماسك في الجَمُر
يا ريتو بس يلقى النبق
والجوع يقطّع في الحشا
ألفين سنة .
............
أدونا بس حق الصَبُر
خلونا من غش الكلام
وعد الرخا ، وليلة القَدُر
خلونا من كضب البشاير
في القصايد والجرايد
أدونا بس حق الفطور
أعفونا من حق ( العوايد)
و( النفايات)
والدوا
وكفاية ( فَكْ عكس الهوا)
.............
يا مؤمنين الشعب وين؟
تاكلوا الثمر
والشعب تدوهوا
النوا ؟!
خلونا من حشد المواكب
بي أجاويد الجرايد
والإذاعة
والإشاعة
وبي مناشير الوظيفة.
كم مرة دقيتو النحاس
في لمبة طقت وطرشقت
أو ( ذرة) جاتكم
حتى لو كانت خفيفة
أو ( نبلة)
ناشت باب جنابكم
وعطسة قَدّت للرهيفة
أو هاجسة مرقت
من عقول عسس الخليفة.
............
خلونا نمرق من هدومنا
ونغلي نهتف للكرامة
والشهامة
والحساب الفي الكتاب
وللرغيفة وللحليفه :-
ما في جُحراً
تاني بلسع
ومافي عذرا
للفوارس تاني بشفع
ومافي ومضاً
في عقولنا الصاحية
نلقاهو إنطفا
وما في رجعات تاني
للشوك والجفا
...........
ورونا كيف ننسى الكوارث
يا فوارس
الإنكسار
الإنشطار
الإنحسار
الذلة لي ناساً كرام
موت العروض
دك الفروض
بلع الحرام
ورونا كيف
بس لينا يوم
( بعتوا الترام)؟!
ورونا كيف
لمعت وشوش
كبرت كروش
وأنحنا ناس ربط الحزام.
كَسَر الخراب مِرْق البلد
حتى النفوس
صبحت حطام
أدونا بس فرق العمر
سووا المعاش
حبة لحم
فوق العضام
أو ضحكة من جوه القلب
أو لمبة في جوف الضلام
ولو أصلو موت ،
أدونا موت
حق الكرام
...........
خلونا من جنس التخاريف
في الثقافة
ومهرجانات السخافة
أدونا بس
حبة ( كُنافة).
**
ياتو حرفاً يوم هتف
بي غبنو
أو صادم وقف
أشّر علي حق ( إتلهف)
أو علي خطف الشَرَف
أو غنّى للناس
والشمس
وإتحدى للظلمة وعزف
وما اتخنق صوتو ونزف ؟
..............
حرية وين يا مؤمنين؟
صوتنا وين يا موحدين ؟
الشعب وين في السلطة
يا امة محمد أو يسوع
القسمة في المال والحُكم
ولاّ المظالم والدموع ؟؟
يا شراكة
يا تحالف
يا تخالف
يا شياكة
يا قُباب
يا رهاب
يا خطابة
يا شيوخ
يا شلوخ
يا مهابة
إنتو الفوارس في المسارح
ونحنا ( كومبارس) الغلابة.
إنتو أبطال القصص
ونحن التلاميذ
في الحصص
إنتو الأكابر في المنابر
ونحن حُراس المقابر
بتصدقوا؟
أو تضحكوا ؟
قسماً عديل
يا نبقى نحن السادة
والحق والقيادة
وإنتوا خدامنا وزيادة
نطلع نكون
نحن المنابر والإمامة
أوتقوم بينا القيامة .
الشعب ما ضحكة وقمامة
والصنّة ما بر السلامة.
..............
يا ناس كفاية
من خراب
نبل الضماير
والهواجس في البشاير
ومن طلاسم جاية باكر
ومن تعاويذ الولادة
ومن كضب يوم السماية
ومن تهاليل البداية
ومن عويل خط النهاية
ومن صراع كل الديوك
للكراسي وللولاية.
..............
يا ( مبيور) ويا ( جلابة)
أنحنا الشعب
سدْرنَا ولَّع
وكركب تب
حتفاوضونا ؟؟
ولا نولِّع
ونبدا حرابة
نخش الغابة ؟؟
...........
..........
ياتو ورقا إتمضا
وكان دوانا من الأذى
وياتو ظلماً إتنسى
بس عشان مكاً ضحك
أو عشان سيداً عفا ؟!
