Home

( إهداء إلى روح شقيقتي وصديقتي وحبيبتي نايله صديق الملك). شعر : هاشم صديق

( الذكرى الثالثة لرحيل شقيقتي وحبيبتي نايلة صديق). سلام... لارنجة بت صديق

Folder: 
هاشم صديق
( الذكرى الثالثة لرحيل شقيقتي وحبيبتي نايلة صديق).
سلام... لارنجة بت صديق
( إهداء إلى روح شقيقتي وصديقتي وحبيبتي نايله صديق الملك).
شعر : هاشم صديق
سويتلك عقد وغويشتين
من أنضر بلح قونديل
وساهرت ليل بي حالو
شان أنسج من السعف إكليل
يليق بي رأسك المرفوع
ونصبتك أميرتي عدييل
.....
وسرت يا نايله
بين (مساوي) و(الحلفايا)
ذاكرت الجذور وبكيت..
وركيت في شراع مركب
قصاد بانت في عرض النيل
صرخت من الوجع مجروح
آآآه يا نايله من نار فقدك
شوتني عديييييل
فاض ابوعنجة بي دمعو
وإتحكر في شارع الفيل
وقع سوق بانت المهدود
برك من حزنو غلبو الشيل
.....
آآآه يا نايله بتذكر ونحن صغار
لعبنا سوا
مشينا سوا
ضحكنا سوا
نتسابق في عرض الحوش
تقول أندر جنس في الخيل
لعب البلي يا نيللي
والكوتشينة
كمان حرينا
تقول أمي بت جنة
دحين يا نايله إنتي وليد؟؟
ده أمر عجيب
وتضحكي زي وتر عصفور
تقوليلا ده هاشم أخوي
قريب وحبيب
ما هو غريب.
......
أغمض وتجري تتدسي
أفتش ليك ورا الأبواب
وفي الديوان
وفي الأركان
وكل البيت
وجنينة الوالد الوارفه
أبوي صديق
واخوك كان في الصغر عفريت
أمثل أسأل عنك الحنة
أقول ليها وين نايله مدسه؟؟
تتضاحك وتتمايل
تقول :
مرت هناك هسه
أسأل أبوك صديق
وأسأل آمنه بت جنه
وأسأل عنك الفله
أقول ليها وين نايله مدسه
تقول ما عارفه
كنت نعسانه
أخدت لي غمضه
وأسأل؟
الياسمينة والجوافة
والريحان والليمونة
واللارنجه... اللارنجه يا نايله
أفتش ليك
أفتش ليك
أقرب أسأل الحلة
وأسمع ضحكك المكتوم
تراك يا نايله فووووق
في النميمة مدسه
وتنزلي لي
واجري عليك واقبض فيك
ونضحك من قلب مفتوح
في زمنا" أصيل ونبيل
......
آآآه يا نايله
اسع وبين جنية الوالد الوارفه
تصبح فيك
تمسي فيك
حل محلها
السيراميك
كضاب زي كتير من ناس
يبهر فيك
يضحك ليك
يلمع ليك
وفجأة يزلقك
يرميك
يكسر فيك
يدشدش فيك
......
إتذكرت مشينا السينما
متماسكين
وكم مشوار مشينا سوا
رقيصنا سوا
في أعراس الأهل يا نايله
فرحانين تقول طايرين
......
وأتذكر سفرنا سوا
مع الوالد وأخوي حسن
للختمية في كسلا
حليل ناسها
وحليل أهلها
نطلع للجبل جارين
نصل توتيل
لا بنفتر ولا فد مره
مات الحيل
وأتذكر في القطر راجعين
شكلنا سوا
منو البقعد على الشباك
يعاين للخلا المفتوح
جميل أخضر
يرد الروح
محطة تجي
محطة تروح
والمشهد يشد عينيك
ويشد الحيل.
.....
وأتذكر صباك يا نايله
والمنسج
هديتك لي طاقية
وكم مره طرزتي
هديتك لي كان منديل
كان أبيض متل جواك
عزيييييز وجميييييل
.....
آآآه يا نايله
بعد هاجرتي لي مدني
بتذكر كل صباح
يرن الهاتف المحمول
وأسمع صوتك الرويان
بالحنين مغسول
تسابقيني
- هاشم أخوي ود أمي
صباح الخير
آآآه يا نايله من قولة
صباح الخير
وهاشم أخوي
ما بتشبه صباح الغير
تجي الكلمات من قلبك
تسلم في شغاف الروح
ما حسيتها من حلقوم.
كل صباح
بتنفس صباح بانت
على صوتك
وأحسك جوه في فلبي
وأعيد كلماتك الطيبة
هاشم أخوي ود أمي
وأشكيلك عذاب عمري
تصبري فيني
وإنتي الصابره يا نيللي
تمليني
كتير من أجمل الأوراد
وكم آيات من المصحف
وتوصيني
على التسبيح
وأضحك ليك
وأغني معاك يا نايله
( لسه الدنيا ما زالت بخير)
صباح الخير
على ( دردق)
على ( بانت)
صباح الخير
وهسه وين هي نايله؟؟
إتلاشت صباح الخير
وانو الدنيا لازالت بخير
......
مسيخة الدنيا أصلو زمان
بعد فقدك
بقت أمسخ
كمان وكمان
.....
حتى الثورة يا نايله
زي صابونة إتماصت
بقت بروه
راح هدرا"
دم الصبيان.
......
ما أحزن صباح بانت
بدون صوتك
وما اتعس
كمان الهاتف المحمول
و أهي الدنيا
عدم وفصول
.....
يا محمد يا مهند
ويا مصعب
أوصيكم :
بس أدوني من دولابها
فد طرحه
تعزيني
تصابحني
تمسيني
أدفن فيها نار حزني
وأسمع من خيوطها الصوت
- صباح الخير
هاشم أخوي ود أمي
......
سلام ( دردق)
العاشقاها ( بت صديق)
يا جيرانها خمسة عقود
في الفرح والضيق
سلام يا صحبة الأوراد والأذكار
سلام يا صحبة التسبيح والقرآن
والترتيل
سلام لكل ركن في الحي
سلام ناس جزيرة الفيل
......
سلام يا ضريح
( لارنجة بت صديق)
( ترب) مدني
ما جاور ( حمدالنيل)
......
سلام يا مدني
تربة ونيل.
.....
سويتلك عقد وغويشين
من أنضر بلح قونديل
وساهرت ليل بي حالو
شان أنسج من السعف إكليل
يليق بي رأسك المرفوع
ونصبتك أميرتي عدييييل
.......
سرت يا نايله
بين مساوي والحلفايا
ذاكرت الجذور وبكيت
وركيت في شراع مركب
قصاد بانت في عرض النيل.
All reactions:

368368


 
View sudan's Full Portfolio
tags:
  • Login to post comments
  • 5 reads

©10 November 2024 - 12:19pm — sudan