أمدرمَـــان هاشم صديق
أمدرمَـــان
Folder:
هاشم صديق أمدرمَـــان
هاشم صديق
صورتك معاي
ألقَاها في كل المطَارات
والمسارِح والأغاني.
وفي القِطارات البتلهث
ديمة زي نبض الثواني
في العمارات والفنادِق
وفي المنافي والخنادِق.
.......
صورتِك معاي
ألقاها في كل الجرايد
في الصباح
مرسومَة بي حد السلاح
وفي العناوين العريضة
وفي المقالة.
والأناشيد والقصَايد
في البسَاله.
.......
صورتِك وحاتِك ما بتغيب
دايماً حِداي
دامياً معاي.
منقوشه في طوب الجسور
موجوده في خطْو الشهور
دايماً جواز سَفَري
وعلامات المرور
......
مرات أخاف
أضعَف واموت
تحييني بي نظرة أسف.
ومرات أهاب صخر الدروب
تلهبني بي كلمة شرف.
صورتك دوام جَلَد الطريق
حِبر الحروف
إيماني في كل المحكّات
والظروف
هِي الإسم .. خِتم السفاره
التصاريح .. التسابيح
النياشين.. والإماره.
