Author Information
ثقة
Folder:
دندنة
#ثقة
عم تسأليني شو الثِقه
طيب تعي
بدقات قلبي اسمعي
صوت الحقيقه الصادِقه
الثقه
مانا قصيده مدوزنه
ولوحه بفنّ مزوَّقه
ولانا متل طفلة هوى
وشو مدلله وعودا طري
ولانا بطوله خارِقه
الثقه
لما تكوني
بطابور عسكر مارِقه
صرلن عمر
ماشمشمو ريحة مرا
لكن عيونك
بسّ فيي غارِقه
وانك لحالك سور
وبواب مع ناطور
وما ابعت شكوكي
باسم المحبه يحرسوكي
ولا خيوطك بكفّي
تبقا العمر متعلّقه
وانك كمان تصدقيني
شوما قلت
وكيف ما رحت
وفي فرق عن معنى "اصطفل
شوما عملت .. مو فارقه"
وتبقا المسافه بينّا
ما اخنقك بالأسئلة
واعمل عليكي مرجلة
ودور مالاقيلك عذر
وانتي تضلّي تحلفي
مع كلمة : اعترفي بقا
