Author Information
اتكلّمي
Folder:
أغاني
هوّا انتي.. لما بتسكتي
بتقولي ايه
نفسي سكوتك اسمعو
وافهم عليه
قولي اي حاجه .. اي حاجه لو عالخفيف
مش عارف ليه قدام سكوتك ببقا ضعيف
الكلمه بتونّس حقيقي تحوشيها ليه
****
ساعات بحسّ ان السكات
ما هوش من طبع البنات
ومنك انتي رضا وسلام
وساعات بحسّو حرب بارده
والعينين تبقا محايده
لما يبعتلي اشاره للخصام
وساعات ما لوش اي معنى
وليه يكون دايما تالتنا
ما دام بنقدر على الكلام
***
خايف سكاتك ياخدنا في سكة برود
والبرود أكيد ح يصبح يوم جليد
ورغم اني ببقا معاكي ف وسط ناس
خايف الاقي روحي ف يوم بعيد
زعّقي.. ابكي.. اضحكي.. ده احنا بشر
والكلام نعمه جميله لو عرفنا ازاي نعبّر
والسكات زي الهروب والاكتئاب
كل مادا يزيد لحد ما يبقا خطر
بشوف بعينك غمزه حلوه اشتقت ليها
بتقولي حاجه بس حاسه روحي بيها:
"لو كده قررت اخرج من سكاتي
ح تقلي فورا رجعيني لجنتي اللي كنت فيها"
