Author Information
الفاضل عبدالقادر : الطيف السمح
الطيف السمح
***
أقضي الليل ... مع الطيف السمح
والخطوة واللفتات
أقضي الليل
وأذوب باللهفة في الليل الكسى الخصلات
أقضي الليل أفكر فيك
وأطارد في الهجيع نجمات
تقول .... ما بعود عذاباً راح
وقبلك .... وا عذابي الفات
قبلك ما عرفت حنان
ولا ضقت السعد لحظات
وقبلك ... كم حضنت حروف
شعر .... مليان أسى وآهات
وكم قاسيت برايا هموم ....
ونيران في حشاي قايدات
سنين يا غاليه كانت ويل
وكانت سيل دموع كابات
وبيكي وصلت واحة الريد
ولميت الخطى التايهات
وجيت أحضن معاكي حروف
أقولها عشان عيون حلوات
وأبل شوقاً فرد له جناح
عشانك طار سبق خطوات
وجيت أغرق براي في الطيب
وأشوش ليلي بالنسمات
لقيت كفك...
بترحل فوق عيوني تكفكف الدمعات
لقيت صدرك ...
وسادة ريد
عليها أقول حروف غاليات
عليها دوام أفكر فيك
وأطارد في الهجيع نجمات
تقول يا ليلى يا حليلو
زمان بالحسره قيسك مات
