Author Information
صـــُــوَر
صور
شعر: مريم العموري
كان يا ما كان
من ذاك الزمان
لمّا كِنـّا اصغار
كنـّا انقول لمّا ابنكبر
أجمل بكرة راح بنعمّر
لعيون الطفولة
نضوي كل الكون ابسمه
ابأحلى اغناني وأحلى رسمه
لعيون الطفولة
لكن شو يا قلبي صار
ما فِ اغناني ولا فِ اصغار
***
أنا إنسان ابقلبي جمرة
حقي اشوف اولادي صاروا أحلى بكرة
حقي إشبع من ضحكاتـُن
حقي سافِر في أحلامُن
حقي ايكونوا زهرة عمري
لكن راحوا
راحوا
راحــــــــــــــــــــــــــــــوا
***
محـــــــمد
فـــــــــارس
نضــــــــــال
إيمــــــــــان
جرح الطفوله على صدر ِ الزمان
ولقلوب ِ البريئة.. صارت نهب الحقد الغادر
صارت نهب الحقد الغادر
والشوارع صارت اجنازاتُ وصور
خبِّـينا أسانا وشرَّعنا الصور
***
يا ألله مَ احلاكُن عالنعش الحزين
باسَتكُن اقلوبنا لِملوَّعه بسنين
من إيام الألم.. من أوهام الحـِلِم
من آهات الليالي الموجوعة بالحنين
***
واتحوَّلوا أطفالنا لخبَر
ودّع حِلمُن دمُّ وغار
صار ملعبهُن بطن الأرض
بنكبر نِحنا وهِنّ اصغار
***
واتعلّقت أرواحُن على اعيون القمر
وانتحبت أرواحنا اتسافِر إلُن
وابقينا متل اليمامة ال قلبَا جريح
وابقينا متل الغيمة اِل بعترتها الريح
ولوّعــــــها الهجـِر
ولمّـتها صـــــــور
صــــوَر.. صـــــور.. صـــــور
من ذكرى وشجَن
صــــوَر.. صـــــور.. صـــــور
وَدّعــــــها وطــــــــــــن
وَدّعــــــها وطــــــــــــن
مريم العموري
