PostPoems Be Artistic. Be Creative. Be Inspired!

يا زريف الطول يا رفِّ الحمام

دايرْ عالمروج وحالِف ما بتنام

باللهْ احمل مكتوبي ووصّللي سلام

للناس الغوالي الجــــــافو ديارنا

..

يا زريف الطول يا طعم المطر

سابِل عالكروم وسايح عالشجر

يا عينو لا تسهِّي عا ضوِّ القمر

واستنّـي الحبايب يلفو عندينا

..

يا زريف الطول هدّي وماْ تْهدّي

يا مَطْرى الغناوي اللي فوقي تندّي

فصّلتللي ثوبِنْ أكبر من قدّي

تسلم يا الغالي واتظلّ تْهادينا

..

يا زريف الطول يا فرحه وسرور

من يوم اللي وَقَّف للأقصى ناطور

مثل السبع يحامي عن أرضو ويثور

ردّ شرور الظالم عن محرابنا

..

يا زريف الطول وعالهدا بتميلْ

بتسلم عليك إمّ الطرف الكحيل

لِفّلها فؤادك مع عنب الخليل

ليافا الحبيبة سِتّ اعْيادنا

..

يا زريف الطول يا سِيد الميدان

ميّل عالمَواني وخذها في الأحضان

وخبّرلي الغوالي في غزة والخان

ما نسينا هواهم واللهْ ما انسينا

..

يا زريف الطول شِدّ سْروج الخير

وامرحْ عا لِدْراب وسابِقْ زيِّ الطير

هَلّي بَللي جانا وقَهوي وجوهَ الخير

يللي من نداهم جادو علينا

مريم العموري