PostPoems Be Artistic. Be Creative. Be Inspired!

يا زريف الطول يا بدْرٍ بَدى
ضاوي عالمروج وشامخ عالهدا
عا زولك ما شفنا يا الحلو حدا
ويا مغلى خطراتك على دروبينا
***
يا زريف الطول يا الوجه الوَلوف
مش جاسِرْ علينا؟ احنا مِشِ ضيوف
ناسي غناوينا عالجفرة والأوف
ولما تحت اللوزة اسهرنا واسهينا
***
يا زريف الطول مالك يا اغزيّل
مِطرِف عن حارتنا مش ناوي تميّل
بلّهْ امرُق علينا قبل ما اتليّل
قهوتنا ابتستنا ولهفة عينينا
***
يا زريف الطول يا حبيب القوم
باللهِ اتحاكينا لو حتى باللوم
غيباتك يالمهجة مِثِل دَقِّ الثوم
زعلان من الدِنيا والاّ علينا
***
يا زريف الطول كَنّك ما بتدري
إحنا على البعد بْنِحْري وبنمْري
دخلك ما اطّولـِها هالعمر بيجري
سايق على عيونك مرّة لاقِينا
***
يا زريف الطول والدار اِبْلا روح
وحمام البيارة من شوقو مبحوح
تـِخبَرْ لـمّا كنا انطعمي عا لـِسطوح؟
يِلفي لجل يشوفك، ليش مجافينا
***
يا زريف الطول دارك تستنى
تزرعها زيتون وتين وكِرْسنّه
هينا مدّينالك ايدينِ الحنّة
مِدِّلنا ديّاتك وارضى علينا