Author Information
أنا بيكِ بأكون انسان
Folder:
Family
وحبِّك معايا قبل الزمان بزمان... غالى عليَّا و أغلى من روحى ياأمى
واتمنيت وياريت لو يعنى ف الامكان... تِبْقِى ف كيانى ف كل نقطة ف دمى
كانت بدايتى جوه حُضْنِك الدفيان... شيلانى ف عينِك و لَحْظ الرمش بيسَمِّى
ولا أصفى من قلبِك ملانى حنان .... ولا أندى من همسِك نطق اسمى
وازاى و أنا جنبِك أكون حيران .... وانتِ اللى حامله ف البعاد همى
تجرى عليَّا.. تروينى و انا العطشان... ولو ناديتك بِكُل ما فيكِ بِتْهِمِّى
خليكِ جنبى ده أنا بيكِ بأكون انسان... وضمينى لحضنِك بالقَوي ضُمِّى
دى الدنيا ياما كسرتنى من الأحزان... لِمِّينى ف جراب الحياه لِمِّى
ورجعينى ده انا عمرى ماكان لى مكان... الا بقُرْبِِك وانا بأهمس و اقول
أمى
