PostPoems Be Artistic. Be Creative. Be Inspired!

#ملل

عم خاف لو قلك أنا ملّيت

تفكّر بإني بيوم ما حبّيت

وما يوصلك بشو أنا حسّيت

لو قلت أنا ملييييييت.. 

مليت من كلشي

وخوفي دغري تزعل وتمشي

من دون ما تفهم

شو يعني الملل

ويكبر يكبر هالزعل

وصير اتمنى يا ريتني ما حكيت

ملّيت من حالي

من لون شعري

من شكل تمّي

ملّيت من اسمي

من عطرك ال صرلو عمر

علقان ع كمّي

من قهوة صباح الخير

وفيروز .. 

نوعا معا بنفس الوقت

وتصير متل الصلا النغمه

من تياب صيفيه

من تياب شتويه

من نفس السؤال

كيفك اليوم

من همّك وهمّي

وخوفي ل شوف بالعيون ظنون

وتسأل شو يللي غيّرك 

والعشره كيف بتهون

وخوفي تقلّي صار لازم نفترق

ما عاد فينا من جديد نكون 

وخوفي الملل 

يقتل شو باقي من الغزل

لو انا ما قلت

ويضل الهوى لسكوتنا مرهون