Author Information
معقول انت بتحب! ؟
Folder:
دندنة
بعرف أنا
إنّو لبيتك درب
ما بيمرّ من عنّا
عن جد انت بتحبّ؟!
وكيف مابتبرم هالأرض كلّا
كرمال تتصبّح
بريحة الياسمين
من جنينتنا؟!
بعرف انا
قدّيش شغلك صعب
وشو سارقك منّا
معقول انت بتحبّ؟!
وليش ما يكون وشّي
فاتحة النهار
ليرزقك الله
كرمال شوفتنا
خير الدني نحنا
شوف الفرق بيناتنا
فرق الشعور
ما بين تلج ونار
سميتن انا عمري
وعندك بقو
شوية حروف صغار
ويمكن يجينا يوم
تقول حتى الحب
ما في الو معنى
