|
للزغار بس
إلى كل صغار العالم
أهدي بوح روحي
وهو ما كنت ألقيه في حفل تخرج أطفال روضة " الشهد " لأعوام ثلاث :
***
انت الأمل يا بني
جنّات حلمي هالهني
ضحكات طفل مولدنه
ووراق عمر ملوّنه
أنت الأمل يا بني
يا قلوب تدعي بالصلا
يا دروب بتقلك هلا
يا طيوب فاحت بالحلا
انت الأمل يا بني
يا ورود من روض الفرح
وموّال بعدو ما انجرح
بلبل على غصنو صدح
انت الأمل يا بني
***
اسقي البذره وارويها
شجره كبيره تلاقيها
وقد جهودك عليها
اللله بيبارك فيها
يا ناس الطفل مرايه
بتعكس فيها التربايه
المسؤوليّه علينا كيف
يبقى هالطفل آيه
صفحه بيضا قلب الطفل
شو ما كتبنا رح بيضل
رح نكتب أحلى الأفكار
حتى الطفل علينا يدل
***
هلق صار لازم قلّك
اني كتير رح اشتقلك
يا رايح عنا لبعيد
لتحقق حلم أهلك
يا زغيّر شو حبيتك
وجوّا القلب خبيتك
نغمة فرح غنيتك
وقلبي هوّ محلك
يا ما غمرتني البهجه
والبسمه تلوّن وجّي
لما تعد وتهجّي
شوي شوي يكبر عقلك
بكرا لو يجمعنا الدرب
أنا ختياره وانت شب
قولك رح يعرفني القلب
لو حناني يندهلك
***
ولو يا قلبي
معقول قللي هالحكي معقول
الطير اللي ربيناه
وسنين حبيناه
يهجرنا وينسى
مقعدو ودفاترو
أو زرقة المريول
نشّف القلب بحر دمعاتي
وقللي : " يا زغيّره وما بتكبري
وعنك أنا مسؤول
هيك الدني
عم نلتقي تا نفترق
وبعد السفر في وصول "
يا قلب شو بتحكي قصص
رح ضل اسمع شو الي بتقول
***
يا حلوتي لا تكبري
تخمين رح تتغيري
ويزيد من عمرك سنه
ويروح هالفرح الهني
وتدور فيكي هالدني
ويصير بدّك تسهري
ضلّك زغيره علينا اتدللي
ضلّك عن خبار الطفوله اسألي
ضلّي اضحكي وتمرجحي
بقلوبنا .. بعيونا
ولا تستحي
يا ريتني زغيره على كتف الجبل
رندح قصيدة حب وغناني غزل
يا ريتني ضلّيت طفله مولدنه
تملا الدني
رقص وغني
وتزهر على خدّا القُبل
يا ريت
***
يا نحله دوري دوري
لمّي الشهد من زهوري
لمّا روضي بتزوري
ع دروبي يفتّح نوار
يا فراشه عمري اللي راح
بعيونك عم شوفو لاح
روحك الها الف جناح
ترفرف تتكفي المشوار
ويا ورده اللي رعيناكي
بنبض القلب سقيناكي
لو تنسي ما مننساكي
يوم ال جانا الورد زرار
***
الشهد بروضتنا كلاّ
فيكن عم يحلا ويحلا
عم ادعي وصلّي ل الله
يحفظكن تا تصيروا كبار
ايدينا تودع وتقول
مهما العمر يطول يطول
دفاتركن مع المريول
رح تبقى احلى تذكار
ولو فليتو ورحتو بعيد
انتو الأمل وانتو العيد
بكل بسمه في فجر جديد
تطلع شمس يطل نهار
***
حلمت بنومي يا امي
هالدنيي صارت جنّه
مافي خوف ولافي جوع
عايش فيها متهني
حلمت بنومي مافي حروب
المحبه تغمر القلوب
وسلام يوحد الدروب
وبدل الدمعه عم غنّي
دخلك قولي يا امي
شي يوم بيصدق حلمي
وبيعلا مجد الكلمه
وتاريخي يخبّر عني
***
يا عصافير الدوري
يا وردات الجوري
يا فراشات .. يا نحلات
يالله روضي زوري
خبيتلكن شهدي
حتى تضللو عندي
بس الحلم الوردي
طيركن لسطوري
أمانه يا زغار
لو طال المشوار
لا تنسوا هالدار
تذكروها عطوري
***
شفت بوشك جنّة وعد
وع جبينك في نجمة سعد
وبقلبك فتّح نوّار
وبكلامك طعم الشهد
وبعيونك شفت حالي
زغيره وكل شي بيحلالي
طهر ورقه وعفويه
وفكر بيطمح للعالي
قلبي بيدعيلك يا بني
شوفك شب ومتهني
يا رايح عنّا لبعيد
الشمس الجايي مستني
يا قاصد بكرا تبقى
تذكر لمّة هالملقى
هَي آخر صورة تذكار
للروضه وأحلى رفقه
هَي آخر صورة تذكار
للروضه وأحلى رفقه
***
 *ثناء درويش*
|
