Author Information
لوعة
Folder:
دندنة
- ماما ليش رفيقي مات
- خالص عمرو
- و كيف بيخلص عمر الورد
و بعدو عا امو زرار
وغصونو لسه ما كبرو
- كلو بأمرو
- ماما ليش تيابي عتاق
صرلي لابسهن من سنين
او كلشي عا خيي داق
و رفقاتي تيابن ألوان
و كل واحد يتباهى بعطرو
- الدنيا يا امي ارزاق
و نحنا رضينا بالمقسوم
و لقمتنا كل يوم بيوم
نيال الصابر عا صبرو
- ماما كيف انخلق الكون
ووينو ألله
ليش ما بشوفو
ليش ما بيوفي عنّا ديون
ما دمنا بالدنيا ضيوفو
و ليش ما بيحمل عنك همك
يخبيكي من الحزن بصدرو
- يا ابني هالرب كبير
بس الناس قلوبا صخر
لو بترق ولو بتحن
ما كنا بهادا التعتير
الو علينا حمدو وشكرو
- ماما ايمتا رح بتجيبي
اللعبة اللي شفتا بنومي
- ماما ليش بتضلي تصللي
عليي مفزوعه بتقومي
- ماما .. ماما
ردي عليي
عيونك حمرا
هيدي دموع
ولا البصل بيحرحرها
متل العاده
تقدس سرو
