Author Information
عيد ميلاد نور ٢٠١٨
Folder:
معايدات
ضللي اضحكي
ليزهّر بصدري الوجع
و يجبر عضم باب انخلع
و ضمّي خيالي بضحكتك
تلاقي الدني عتما انقشع
ضللي اضحكي
شفافك إذا ضحكو صلا
عيونك إذا ضحكو
بسملة قرآن
ضللي اضحكي
نحنا ما جينا عالدني زوار
النا بكل مطرح فرح
يمسح أسى
يبلسم جرح
قبّة ولي و مزار
و قلوبنا بتبقا طريّه
لو يبست عروق العمر
و الزمن ختيار
ضللي ضحكي
هوّي اللي سماكي
بنت نيسان
و توّج جبينك بالندى و النور
و رشرش بدربك زهر
و عطّر من دعستك أكوان
برجك حَمَل الله
المحفوظ من عين الأذى و الشر
يا الحامله طيبة أرض
ما بعمرها بتنهان
