PostPoems Be Artistic. Be Creative. Be Inspired!

الف وباء .. يعنى الوطن..

وقفنى يوم سلك الحدود..

حجزنى عن ارض الوطن ..

مرمغت راسي فى التراب..

قدام شويه م الجنود.. صابهم سكات..

لحد ماسمعت السؤال .. مستنى ايه؟.. امشي بعيد ..

هاتروح بلاش .. قمت التفت للى قال ..

قلت ماله .. هانقتل؟..

بس اما اموت.. من فضلكم ..

عادونى بعد السور قتيل .. لجل اندفن ..

ضحك اللئيم .. مع ضحكته زعق و قال .. امشي يالا ..

فكرت نفسك مين؟ نديم؟ ..

سالته .. هو سيادتك تعرفه؟ .. قالى الجبان .. طبعا اكيد ..

مجنون وشفت كتير اخوه.. من جنسكم ..

سالته جايز اعرفه .. هو سيادتك تبقى مين؟

قالى انت مالك يا غبي..

راح اجرجرك على مكتبى ..

حاولت المح يبقى مين.. بينه و بينه ستار كبير..

قلت اما اميل .. يمكن اشوفه و اعرفه..

او ماعرفوش..

فجاه سمعت الصوت خروشه ..

صوت مانسهوش .. مسكة سلاح..

و الشر قرب.. بان و لاح..

قلت خلاص .. رحت بلاش..

و الدم اصبح مستباح..

وطلعلى من خلف الستار..

ظابط برتبه ماشفتهوش..

اصل الشروق ظابط ضياه..

على نينى عينى بالتمام..

فوقت قوام .. وجريت بعيد..

انا كنت واقف مش تمام

طول البعاد خبي معالم سكتى..

خلانى واقف للعدو مستنى القى فرحتى..

اديته ضهرى و اختفيت..

غيرت جلدى و هدمتى..

اتارينى واقف جوا ارضى..

اتارينى ناسي طولى عرضى..

طول الغياب لخبط حروفى.. واتنست ..

فكرت ان الحرف باء.. وانا م الغباء..

كنت هنا .. واقف على تراب الوطن..

الف و باء.. يعنى وطن..



طارق المملوك

17/5/2006