Author Information
والله لو جبنا الفساتين
Folder:
طارق المملوك / العامية المصرية والله لو جبنا الفساتين
واكلنا ف مطعم لسنين
وعملنا لشعركوا توليفة
وغسلناه بصابونه و ليفه
ماهتنفع كل الحكايات
الست اتخلقت منكوشه
من بعد ما كانت ف الكوشه
محطوطة ف ورقة سوليفان
اتقلبت مية و تمانين
تقلية بدال البرفان
واخوكم شامم قرفان
حساسية و جيوب انفية
ولا اثر يا حبيبتى عليا
انا برضك شامم زهقان
مطعم ايه والنبى سيبك
طول عمر الست بتتحجج
دايما ولسانها بيتلكك
ماله بس المطبخ و الريحة
اتحدى ان انا ادخل مطبخ
وتشمى عطور راقيه مريحة
اصحى انت بس من النجمة
بطلى تعسيل للضهرية
اشتغلى وورينا الهمة
بعدين اخرجى من دى الهدمة
البسي جلبية و بسيطة
ورينا شعورك مفروده
بش بس المنديل ابو قويه
واتشطر بس انت يا خويا
مش فالحين بس ف تخزين
فساتين و هودم متخانقين
حابسينهم جوا الدولايب
ولا مرة نشوفهم خارجين
خلينا بقى نملى عنينا
من حلوة تغنى وتدينا
اه منكم اهين يا حريم
بنشوف نسوان منكم تشرح
نتكعبل نتجن ف راسنا
ونروح علطول مقتصرين
ماذون و جوازة بتابيدة
تتشقلب كل الموازين
ونشوف الراس المنكوشة
و عجين فلاحة ومهروشه
شجر الجميز طارح تانى
وهانرجع تنمنى موزاية
او حبة تفاح لبنانى
خليكم هنا وبحسرتكم
سايبينها خلاص و مهاجرين
1/5/2006
