PostPoems Be Artistic. Be Creative. Be Inspired!

ابدا بس ازاى معرفشي ..

امسك نفسي .. واكلم فيها ..

واقول ماتخافشي ..

حاسس انى قرفت و حاسس ..

ان انا عاوز اخبط راسي ف قلب الحيط ..

أنا من كــُتر الأسى والحزن خلاص مليت ..

قلت يا ريتنى ما كنت قريت ..

امسك قلمى .. واكتب كلمة و اشطب سطر ..

بقى يا اخوانا دى صورة مصر ؟ ...

مصر العقاد ويا كبيرنا طه حسين ..

مصر نجيب .. احسان و جاهين ..

مصر الفن جميل و مزوق ..

مصر الواقع اللى بيوجع .. واللى يروق ..

مهما بيوجع بس ده حالنا ..

واللى قريته لا يمكن يوصف .. بيتى و بيتك ..

ولا عمارتى .. ولا جيرانى ..

ولا هايكون ابدا كده حالى ..

هى رواية .. زى ما قالوا ..

المفروض انها لعمارة ..

وكمان كاتب غاص ويانا ..

وويا خيالة .. بالف جناح ..

قلت اروح وياه واشوف ..

اهى اوقات يمكن نتسلى ..

ويا خيالة الف و اطوف ..

بعد شوية قلت اكيد انا مابقاش مصري ..

كل ده يحصل وانا مش دارى ..

يمكن اكون انا قافل عقلى ..

قلت خلاص والله مانا قارى ..

بس استنى يا عم و شوف ..

يمكن يطلع قاصد حاجة..

قاصد ايه والله ما هيطلع قاصد حاجة ..

اهى ديتها يعبى شرايط ..فيلم و ساقط ..

ويلمله مصروف كام طالب ..

يطلعوا منه مصالحين حالهم ..

هوب يقولوا .. ده احنا ملايكة ..

خدلك يابنى سيجارة بانجو .. ولا حشيش..

خدلك نفسين ياللا وعيش ..

شفت العالم من حوالينات عاشوا ازاى ؟...

ده احنا ملايكة ..

سلب و نهب .. وضرب و رشوة ..

تل خيانه و حاجات تانية ..

وقف القلم اللى انا ربيته ..

مكسوف .. خايف انه يقولها ..

والله انا عارف ان بلدنا ماهياش جنة ..

ولا شفناش من يوم ماوعينا .. لا جاه ولا فرحة ..

وماهياش برضك مستشفى ولا مصحة ..

اتعجبت و قلت لحالى ..

بقى معقول يا اخوانا الراجل ..

ضيع سنتين وسط العمر..

علشان يتحف شعب بحاله ..

بقصة فظيعة رسمها خيالة ..

وكمان عاوز يقنع عقلى ..

بان عمارة نسج خيالة بقت وسطينا ؟؟ ..

الا ان كانت مصر بلدنا تكون خمارة ..

ولا ماخور ومحدش دارى ..

عاوز الحق ..؟

احنا سكتنا لما السيما كتير فضحتنا ..

لما اتقال اننا نصين ..

نص ومدمن .. اما النص التانى صاجات ..

والمرة دى هيقولوا زيادة ..

واحنا اكيد طبعا هانصقف ..

ونقول هو ده يبقى الفن الاصلى .. فن الواقع ..

ايوة ده واقع .. ومافيش اوقع من كده تانى ..

وانا يا اخوانا قلت اما اكسب فيكوا ثواب ..

وده عنوان الظرف الفاضي ..

اللى مافيهشي سؤال و جواب ..

حبيت اقول كده ع المدارى .. وف المليان ..

هى نصيحة .. ليك الحق انك تقبلها ..او ترفضها ..

بس باقولها ف وسط اخواتى ..

افتح عينك .. قبل ما تتعب ..

قبل ما تجرح امك .. اختك ..

قبل ما تتعب زى حالاتى ..

وقبل ما همشي .. حابب ااكد ..

هى حقيقة و لازم اقولها .. قبل ما تحصل بعد زمان ..

لو سلمنا بان الحاصل من حوالينا .. وبينا الان ..

هو واقعنا ..

يبقى اكيد مصرنا راح تبقى ..

هى عمارة يعقوبيان ...



طارق المملوك

24/4/2006