PostPoems Be Artistic. Be Creative. Be Inspired!

آسف إني مكنتش صاحي ..



اسمع صرخة بتملى الكون ..



صرخة قوية .. ف وسط الميه ..



صرخة أب .. و أم .. وأخ ..



وإبن حنون ..



صرخة إبنه .. وجده .. وجد ..



صرخة تهز الدنيا بجد ..



آسف إانى مكنتش صاحي ..



آسف إني بنام متغطي ..



ونومي تقيل ..



آسف إنى بنام و اتدفى ..



وانتم بايتين وسط الميه ..



بارده كإنها قلب الكون ..



وسط قروش ميته م الجوع ..



آسف إن البحر ماكنشي ..



قادر إنه يحقق حلمك ..



والأحلام ف زمانا عزيزة ..



حتى إن كانت حلم رجوع ..



قرش الميه ماعدش يخوف ..



وسط قروش سكنت حوالينا ..



تتاجر فينا ..



اكل ملوث ..



ميه تموت ..



وأما نسافر نركب خرده ..



أما صحيح يا أخوانا دى فرده ..



ايوة سياسة حلق حوش ..



بقى ارواح عمال و غلايه ..



أصبح بس تمنها قروش ..



شفتوا قروش البر يا هو ..



ماتشبعش .. مابتزهقش ..



ما بيكفيش الجسد العاري ..



وسط البرد .. ووسط الموج ..



قيل ما دمك يروي عطشها ..



لازم يملى كمان الجيب ..



ولا فى كسوف ..



ولا بقى عيب ..



شفتوا قروش البر الظالمه ..



سرقت حلمك وسط الميه ..



حلمك غارق ..



حلم الطفل بينده أبوه ..



حلم الأخ بيبكي أخوه ..



حلم بيسكن قلب الأم وإبنها غايب ..



مدفون تحت جبال الميه ..



قصص الغلب الساكن فيها ..



شاهد وسط الجثث العايمه ..



حلم الزوجة ف حضن يدفي ..



وسط برودة بحر الموت ..



واقفه قصادى ومستنيه ..



تلمح وسط طيور الموت ..



صوت الغايب ..



شايل حلم لأهله بسيط ..



حلم قروش ما تفكش ضيقه ..



ضاعت وسط الميه غريقه ..



ولا نفعتش تجوز إبنه ..



ولا نفعتش تكون بيت ..



ولا قدرتش تفرح عين ..



آسف إني .. وغصبن عني ..



غلبني النوم ..



بسبب تعبي ولفي يوماتي .. لمدة شهر ..



ورا قرشين اصرفهم يمكن ..



ف دقيقتين ..











طارق المملوك



7/2/2006