PostPoems Be Artistic. Be Creative. Be Inspired!

واحد صاحبى .. وشاعر زيي ..

انطس ف عقله ..

وورا مراته قصيده كتبها ..

وكانت يعنى قصيدة حب ..

قلت احكيلى .. كمل قولى ..

حصلك ايه ؟ ..

قالى يا صاحبى .. عديك و عدوك ..

هب لقيتها .. اتنفضت .. تشخط ..

لسه بتكتب حب يا فندى ..

قوم قربلى .. تعالى لعندى ..

فاكر نفسك لسه شباب ؟ ..

والله لخلى نهارك كله هباب ف هباب ..

قوم و اتفرج ..

وشك كرمش .. شعرك شاب ..

فاكر قلبك لسه يدق ..ولسه ما مات؟ ..

ولا اظنك لسه موقف قطر العمر ..

ده يا سيدى واقف ع الباب ..

فاكر لسه بيعجب بيك ستات وبنات؟ ..

ولا عيونك لسه تميز بين جميلات ..

وبتختار من بين البيض و السمر؟...

اصحى وفوق ..

بينى وبينك اتخضيت ..

قمت جريت علطول لمرايتى ..

بكلم نفسي ..

يجي منين الشعر الابيض ؟ ..

حتى الابيض ف الايام دى شحيح ف السوق ..

دنيا سواد .. عيشة هباب ..

حتى علمنا تلات تتلات ..

اخر حاجة منه سواد ..

فركت عنيا .. وقمت مبحلق ..

شعرى كانه زى ماهوا .. سواد ف سواد ..

زى عيشتنا تمام بالظبط ..

قتلت البسمة الهاربه يا صاحبي .. واتطمنت ..

واترسمت تكشيرة سيما هب بدالها ..

ورحت ندهها ..

قصدك ايه؟ ..

ايوة يا ستى انا لسه شباب ..

لسه القلم الحاوى ف ايدى ..

ولسه هايكتب احلى قصيدة وكلمة حب ..

حتى الحلم يا خويا اتصادر 00

اصبح ذنب ..

مابقاش لينا الحق نشوفه كلام ف قصايد ..

ولا نكتبه دواوين اشعار ..

ولا بنشوفه كمان احلام ..

والله يا صاحبي العقل احتار ..

دنيا قلوب مكبوته وعايشه حياتها ف نار ..

ممنوع تحلم الا ان كنت حقيقى شباب ..

دنيا غريبة .. عذاب ف عذاب ..

قلت يا صاحبي .. حلك عندى ..

خدها نصيحة واعمل زيي ..

وري مراتك حلمك قبلك ..

اشترى نفسك ..

سيبها تشوفه .. يمكن ترفض ..

يمكن تقبل .. او تعنت .. او ترميه ..

او لو كانت هادية وراسيه ..

تقطع منه اللى مزعلها .. وتجيزهولك ..

تحلم بيه ..



طارق المملوك

23/1/2006