PostPoems Be Artistic. Be Creative. Be Inspired!

يا ست الكل يا بلادى ..

يا موالى .. يا اعيادى ..

يا ست الكل متشوق ..

اشوف الكون بيتزوق ..

ويهديلك تيجان الفل ..

واجريلك يا ست الكل ..

واغنيلك يا فوق الكل ..

واحلملك بحدوته ..

وافرحلك بزغروده ..

وألفلك .. وأكتبلك ..

قصيدة عشق مظبوطه ..

يا ست الكل يا بلادى ..



*******



يا نهر النيل يا متراضى ..

وشايل خير ماهوش راضى ..

يجي ويلف ع الفاضى ..

ولا يقابل جبين اسمر ..

يمحى عتمة الماضى ..

يطوف الارض يحييها ..

ويكسيها بلون اخضر ..

وتهادى عيدان الفل ..

وافرحلك يا ست الكل ..



*******



يا بستانى .. يا بستانى ..

تعود الحلوة من تانى ..

على عرش الامل تقعد ..

وتيجى الحلوة بالطرحة ..

تقوم الدنيا تتفرج ..

اضمك واتملى فرحة ..

واهديلك تيجان الفل ..

وافرحلك يا ست الكل ..



*******



يا روح الروح يا متغرب ..

يا متباعد .. يا متقرب ..

بطعم العزة متشرب ..

تعالى نغنى موالنا ..

كلام مصري .. ومتعرب ..

زمان العزة يا بلادى ..

اكيد قرب ..

كلام امثالنا متجرب ..

تعود الفرحة ما بينا ..

ونهديها تيجان الفل ..

ونفرحلك يا ست الكل ..



*******



يا كحك العيد يا متشوق ..

بطعم الحلو متزوق ..

على لسانك يكون سكر ..

ويندهلك .. ويتشكر ..

ويهديلك .. ف يوم عيدك ..

عيدان الورد و النرجس ..

ويهديلك تيجان الفل ..

ويفرحلك يا ست الكل ..



*******



يا أزهر نادى .. واتحرر ..

وصليلنا .. وادعيلنا ..

نكون من جوه زى بره ..

كما بنظهر ..

نقوم .. نقدر ..

ننادى ف وش سجانا ..

ونتحرر ..

ومن ايدك .. نوديكى ..

على ارض الامل اخضر ..

نعود من تانى ونكبر ..

يفوق القدس يتحرر ..

ويهديلك تيجان الفل ..

ويهنيكى يا ست الكل ..

يا روح الروح يا موالى ..

يا اعيادى ..

يا ست الكل يا بلادى...





طارق المملوك

2/1/2006