PostPoems Be Artistic. Be Creative. Be Inspired!

بلدنا بخيرها .. معدش يراضينا ..



بناكل ونشرب .. وجوعنا ساكنا ..



لا اكلة بتكفى .. ولا بق ميه ..



ونيلنا محاوطنا .. لكنا عطاشى ..



بناكل مسرطن .. يا زرعه لغيرنا ..



ونشرب معكر .. ونيلنا ما بينا ..



بيجري لغيرنا ..



لانه ف بلدنا صبحنا وصرنا ..



سادة وعبيد ..



كبارها بياكلوا ضميرها ومصيرها ..



بياكلوا الحديد ..



وزادوا العبيد .. هياكل عجاف ..



سكتنا بنبكى .. سهرنا نخاف ..



على بكرة ألعن هايجى اكيد ..



مادمنا بناكل مسرطن يموت ..



وحتى ف موتنا نموت بالبطئ ..



وموتنا يعذب .. لكنه صديق ..



يريح تعبنا .. وينهى الحكاية ..



رضينا بموتنا .. وصمت الغلابة ..



ويخرس غضبنا .. ويخلص زعلنا ..



وده مش مريح اكيد الديابة ..



بتنهش عضامنا ..  مزاجها تاعبها ..



سكاتنا يضايق ..



مزاجه ف خناقه .. تظبط دماغه ..



يقولك ما تصرخ .. ويقطع لسانك ..



وتيجى تفكر .. فيكسر دماغك ..



واحنا الغلابة .. عيونا بصيرة ..



وايدنا قصيرة .. عشيتنا كآبه ..



رضينا باحلام جدودنا الغلابة ..



فنرجع و نحلم .. كأنا زمان ..



زمان لما خيرنا .. يشبع بطونا ..



وتاكل معانا بطون الالاف ..



وعشوا جدودنا سنين ف الامان ..



وجاتهم مجاعه سنين العجاف ..



ويحلم سادتهم برمز الحكاية ..



ناموا و شافوا.. لا فهموا .. لا عرفوا .



ولا حتى خافوا ..



يموت الغلابة .. عبيد السياده ..



وهما يعيشوا .. وتبقى النهاية ..



ويجي المفسر .. رسول الإله ..



يفسر . وينقذ ..



ويزرع .. يخضر .. بإيد الغلابه ..



وتيجى النجاه ..



مصيرنا بايدينا .. وحلم النهاية السعيدة يجينا ..



اكيد مش ناقصله الا عملنا ..



ويومها هايجى زمان النجاه ..















طارق المملوك



28/11/2005