PostPoems Be Artistic. Be Creative. Be Inspired!

قولى من تانى.. عيدى قوام ..

سامع فرحة صوتك يرقص ..

لما جريلى وغنى يقول: " ايوة خلاص كلها ايام ..

جاية وجايبة الفرح معايا .. اوعى تنام ..

جاية بعشقى .. حنين جوايا ..

بعد شهور عشتها من غيرك.. ف  الحرمان "

قلتى هاتيجى .. قولى كمان ..

حاسس ان انا واهم .. حالم ..

بيتهيالى .. او مش سامع ..

شفت النيل .. وسمعت الست ..

جوا شوارع .. باصه عليا ..

طفت .. وشفت ..

عشت دقايق حب ف حب ..

حاسس طعم الميه الحلوة .. بيروى القلب ..

ده انا من غيرك .. جوا نهارى .. ف ضلمة ليل ..

وسط الناس بلقانى وحدانى .. وعايش ويل ..

جوا الحر بموت م البرد ..

تحت السما والشمس الهادية ..

حاسس ان انا تحت الارض ..

جايه حقيقى وجد الجد؟ ...

اوعاكى تنسي ايها حاجة ..

سايب كنت معاكى حاجات ..

نبض حياتى .. ف دقة قلبك ..

نور احلامى لنينى عنيكى .. احلى ساعات ..

حتى الحلم نسيته وياكى ..

قبل ما اسافر .. فاتنى .. بيسال ..

يترجانى .. وهو بيبكى .. اسيبه معاكى ..

قمت زرعته فى عمرك .. ليكى ..

احلى غناوى ..

هاتى معاكى كل الوقت اللى ماشفتوش ..

ثانية .. بثانية ..

هارجع تانى اعيش وياكى ..

كل الوقت اللى ماعشتوش ..

عارفه يا قمرى ..

قلبى بيرسم وقت لقانا ..

بالف حكاية .. والف حوار ..

واقف مستنيكى بشوقى  ..

واقف اخبى .. قلقى و حيرتى ..

وانت هناك ..

فارد قلبى ليكى يا عمرى .. سجاده حمرا ..

مايخطيش عتبتها الساكنة ..

ايها حد ..

واخد من احاسيسى وشوقى ..

لفة ورد ..

شوفتى بجد ..

لما هاشوفك .. هانسى الدنيا .. الكون يتمد ..

واجرى عليكى .. و تجرى دموعى ..

اجرى اسبقها ..

قلبى لحقها .. وراح متبسم ..

نسى ايام ف بعادك عاشها ..

لما هايجى الحلم فى صوتك .. يلقى الرد ..

ينطق اسمك .. ويا شفايفى ..

عينى تدندن لجل عيونك احلى غناوى .. ف دقة قلب ..

تجرى تضمك ..

لمسة ايديك ويا ايديا ..

فرحة كون .. زغاريد .. افراح ..

ولما الخد .. بيلمس خد ..

يبقى حقيقى .. العمر براح ..

قلبى مصدق .. انى هاشوفك ..

والمس ارضك .. واصبح كونك ..

بس الوقت تملى معاند .. ماشي براحته ..

وانا يا حبيبتى قاعد احايله ..

مرة اجيله يمين و اضحكله ..

مرة شماله .. ولا على باله ..

مرة اتجنن .. واقعد اهنن ..

يمكن يرضى عليا .. يحن ..

قام و اتنطط زى الجن ..

يضحك .. يصرخ .. سابنى ارن ..

وحدى بحايل .. حلمى ينام ..

يمكن أصحى فيوم والاقيكى ..

تختفى حيرتى .. وافرح بيكى ..

واجرى عليكى ..

اضحك .. اضمك ..

واحضن مصر ف نينى عنيكى ..



طارق المملوك

2/6/2006