PostPoems Be Artistic. Be Creative. Be Inspired!

الفتى زياد



ليلة صفا .. ويا الصحاب ..

حواليا قعدوا اترصصوا..

نفتح كتاب .. نقرا قصيدة ..

مواضيع كتيرة منتورة ..

فوق الوشوش .. ظهرت رتوش ..

شايله ابتسامة منورة ..

قلت قصيدة ..

وكمان ياصاحبي .. اتنين تلاته ..

وبكل خفة .. وكمان تباته ..

دخل الولاد .. سالت تقى و كمان زياد ..

يعنى ايه مصر و علم ..؟

يعنى ايه سلم و الم ..؟

يعنى ايه حرب و جهاد ..؟

اصل الولاد غيرنا زمان ..

اصل الزمان غير اللى كان ..

واحنا ف زمانا كنا جيل ..

وهما جيل ..

جيل يتولد بلسان طويل ..

وكاننا شاربين نيلين ..

يجرى لنا نيل .. وهما نيل ..

دول جيل جميل ..

والميزة انه واخداه حماسه ..

قاري تاريخه بيحفظه ..

يقرا انتصار .. يقرا انتكاسه ..

عقل و فراسه .. ولهان سياسة ..

اصل الفتى .. دور لقى .. كشكول قصايدى ..

راح جاى عندى وزوقه ..

ضمه لصدره .. وطوقه ..

وجوا عبه طبقه ..

قام طبقه دستور حياه ..

يوم ما التقاه .. على هواه ..

اصل الولد .. حب البلد ..

وحب البلد مليان اهات ..

وعمر منا بيتسرق .. وبيتحرق ..

ويا الورق .. وف تحقيقات ..

واستجوابات .. وتلفيقات ..

هوا و مزاجه مايتفلق ..

غاوى نكد ..

اهه ده اختياره ..

عاشق دياره .. يوم ماتولد ..

اصل الولد .. مولود اسد ..

عاشق تراب ارض الوطن ..

عامل زعيم .. ثورى قديم ..

اصل احنا جيل ..

وهما جيل اخر الزمن ..

اه من ده جيل ..

بلسان طويل .. وكلامه قافيه ..

دماغه ناشفه ..

بس الحقيقة عيونه كاشفه .. كل العيوب ..

كره الهروب ..

اه ع القلوب .. لسه بريئه ..وبتتولد كاشفه الحقيقة ..

يمكمن يكون مليان جنون ..

بس الحقيقة .. حنون .. حنون ..

عايز الصراحة .. مش غاوى راحة ..

دول جيل جميل ..

ماتقول يا نيل ..

اه من ده جيل .. اخر زمن ..

بخته قليل .. مولود ف ليل ..

بس الجميل .. عاشق تراب ارض الوطن ..

يمكن جراحه .. تخلق صباحه ..

ويكون ميلاد .. على ايد ولاد ..

امتى .. ؟  .. متى .. ؟

يمكن يكون على ايد فتى ..

اسمه زياد ..



طارق المملوك

20/4/2005