PostPoems Be Artistic. Be Creative. Be Inspired!

فى كل يوم يا مصر ... قلوب تبكى .. تفارق ..



شباب محبط بيطفش .. رجال صاحبوا المفارق ...



فى كل يوم يا مصر .. يتولد بينا الالوف ..



مولود حزين بيبكى .. مستنى فيوم يفارق ....



وعجبى ....







فى كل يوم يا مصر .. شعبك يبات صايم ..



صايم عن الافراح .. عايش ويا الهزايم ...



رضينا يا بلد بالهم .. والهم مش راضي ..



كل الخلايق صحيوا .. وشعبك صبح نايم ....



وعجبي ....







فى كل يوم يا مصر ... يموت جوانا حاجة ...



يدبل حلمنا الاخضر ... ونسمع كلام ديباجة ..



اصلاح وبكرة احسن .. كلام بدون افادة ..



لو كان كلام بينفع .. كنا بقينا حاجة ...



وعجبى ....







فى كل يوم يا مصر ... نخسر قلوب نضيفة ...



يا مغنواتى قول .. فين الناس الشريفة ..



قصص الغلابة تموت ... ينقطع صوت الربابة ..



لا ابوزيد الهلالى حي .. ولا الزناتى خليفة ...



وعجبي ....







طارق المملوك



12/12/2005