PostPoems Be Artistic. Be Creative. Be Inspired!

احب اعرف نفسي .. وارسمها ..

و اكسيها ..

و اعريها ..

واوريها كل ما فيها ..

و اخبى الحلو عن نفسي ..

لتفرح يوم بما فيها ..

واحب اقعد مع نفسي .. واواسيها ..

واقضى ليلى ادلعها ..

وساعات يمكن اولعها ..

ويدوب الحق و اطفيها ..

وساعات اصرخ ..

ده من المى ..

انا اصلى ماسك قلمى ..

ومسطرتى ..

وادواتى .. بخططها .. واظبطها ..

اهندسها .. والخبطها ..

بحاول اخترع حلمى ..

واقول يا نفسي لو شفتى ..

او اخترتى ..

انا غيرك .. انا نفسي ..

ماشوفش الا من طاقتى ..

وعينى هى اقلامى ..

واحلامى ..

وحلمى هوا مشروعى ..

ومسموحى ..

وجورنالى .. ومنشورى ..

وحلمى ماكونش غير نفسي ..

انا مصري ..

انا مصري كريم العنصرين ..

انا القلعة .. انا المدنه .. انا الازهر ..

انا الاقدم .. انا الاكبر ..

انا مصري .. وده قصري ..

على نيلى .. على كيفى ..

انا نفسي ..

وانا عاشق كده نفسي ..

وعاشق ميتى .. وطقسي ..

يامصر يا عشقى .. لو تقسي ..

نجوع .. نشقى .. ونتعارك ..

وعمرى ما اخون فى يوم نفسي ..



طارق المملوك

11/12/2004