PostPoems Be Artistic. Be Creative. Be Inspired!

فــــــــــارس



يا ولدى..

دروعى ضاقت على صدري..

شايلها ولا الف عام .. وانت ما تدرى..

دروعى و خوذتى .. وحصانى..

دول حته من جسدى..

واقف ديدبان .. لوحدى مستنى..

مرابط .. ولا املك سلاح و جيوش..

اسود كانوا من خلفى..

نلف الدنيا نتحدى ..

صحارى .. ديابة .. ووحوش..

مستنى يا ولدى00

مستنى زرعة من بلدى ..

تطرح اسود.

تطرح فهود..

تطرح بجيل يمسك لوا نصرى ..

لكن ماجوش ..

قائد كبير كنت انا واقف..

و قدامى صلاح الدين..

كنت جندى فجيش قطز .. وابن الوليد..

كنت بطل وويايا نسور حطين..

اسال عليا حصون يافا ..

واسوار عكا .. و عسقلان..

هتلاقى صورتى منقوشة ..

و كان درعى و كان سيفى امل .. وامان..

امجادى تاريخ اجيال .. تاريخ امة..

و فين هما ..

واقفين بيتصوروا جنبى ..

راسمين بايدهم رمز النصر متخبى ..

يا ولدى نفذ صبرى..

انا لسة جسد نابض ..

و متحفك ماهوش قبرى..

نجينى يا ولدى ..

دروعى .. وخوذتى .. وحصانى اهه جنبى ..

لكن بسف مكسور..

متكتف ولا المسحور..

ببكى على جيلكم ..

شباب خايف .. ضعيف .. مذعور..

لو سمع ف يوم صيحتى ..

يقف قلبه ..

ومش دارى .. عشان مكسور..

يا ولدى .. اريد حكمك وبيه راضى ..

انطق و قول الحكم يا قاضى..

مين فينا اللى محتاج متحف..

مين فينا اللى واجب عليه يسقف..

و ينكسف من التانى ..

مين فينا اللى هيخبى وشه و يدارى..

يا ولدى .. ارفع سيفك .. ناويلهولى..

واسمع كلام جدك .. وشوف قولى..

لو منصرتنيش .. و ماطلبتش ف يوم تارى..

لمسح كتابى من عمرك ..

واسيبك بدون ماضى..

يا ولدى ..

نفسى اخدك كده ف حضنى..

نفسى اسيب سجنى..

واصرخ باسمك .. ويوم ماهتف ..

اقول ياولادى ..

مركب الابطال .. بتبعد .. و بتجدف..

فكونى ياولادى..

لااجل اعود نسر ف سمايا ..

الف الكون ..

ده عمرى ما كنت متكتف





طارق المملوك  

14/3/2004