PostPoems Be Artistic. Be Creative. Be Inspired!

عيد الضحية



مواشى بترعى .. فى غيط حدانا..

وعيالنا يا عينى .. بايته جعانة..

ناموا حزانى..

مواشى على كل شكل .. ولون..

مشاة .. بحرية ..

مشاة .. جوية ..

ومارينز .. وكوماندوز ..

واسامى وهمية ..

بترعى .. لا بتترك اخضر ..

ولا يابس ..

لا بتفرق معاهم ..

ان كنت عريان .. ولا كنت لابس ..

ده حاميها .. ولا حراميها ..

ولا خرابين بيوت..

تعمر .. ولا تخرب ..

تاكل .. ولا تشرب ..

تتكلم .. ولا تعيش ف سكوت ..

المهم ترعى ..

تاكل و تسمن ..

تبلبط .. تنزل الترعة ..

وتنام نومه ملوكى..

وعلف من بيت ابوكى ..

والحساااااااااااااب..

يوم الحساب ..

بلطجة..

ورمى جتت..

تتكلم .. يقطعوك حتت..

تلم..

وبارد ..

وغتت..

لزقة انجليزى ..

ولزقة امريكانى..

وعلى كل لون .. وجنس ..

و مله..

هبطوا علينا رباطية .. وشله ..

واحنا الغلابة ..

وقعنا وسط العصابة..

اربعين حرامى .. ولا جيش جراد..

قصر الكلام ..

جت المواشى.. فى بلد من البلاد..

تاكل بلاشى ..

تشرب بلاشى ..

تنام بلاشى ..

خليها ترعى ..تسمن و تكبر ..

يا اهل بلدى ..

الخلق جاعت ..

باتت بتحلم ..

تاخد عيدية..

الله اكبر ..

سوقوا المواشى ..

اليوم يا ولدى .. عيد الضحية..



طارق المملوك  

4/4/2004