PostPoems Be Artistic. Be Creative. Be Inspired!

صاحب المقام



الحته هاصت..

ظاطت .. علقوا الانوار..

دقوا الطبول ..

هاتوا الندور .. و قيموا زار..

و كل حي و له مزار..

واحنا ف حارتنا فيه المقام..

شموعه قادت ..

فيه عيش و نابت..

و ريحة بخور..ماليه الشوارع ..

دى من جوازها .. وده من طهور..

لجل النبى صلي ..

مولد و صاحبه مقامه عالى ..

ولا تلتميت ظابط..

************

سيدنا ف مقامه .. ابيض..

قبته .. بيضه ..

تسوده الايام .. لكن العقول بيضه ..

لف المقام ..

هيص و دور ..

و اصرخ .. وقول ..

مدد يا سكان المقام ..

***********

مولد سيدنا الامريكانى ..

نقول تانى ..

مقامه عالى ..

و له ببان.. بس المقام عالى..

و الخزنة متروسه ..

ندور .. طهور ..

ووليه جايه تصرخ .. تقول ..

مش طالبه خلفه ..

ولا حتى سلفه ..

ندرن عليا ..

ييجى المدهول ..

يرجع لبيته ..

من غير لا الفه .. ولا حتى كلفه ..

يبات ف حضنى ..

ف وسط خلفه ..

لاسقيكوا نابت ..

و الست خابت..

اصل المدهول .. الامريكانى ..

ماكنش صالح .. ده كان حرامى ..

و الناس يدوبك ..

لقيت مقامه ..

ف ليله سوده ...

قاموا و قالوا ..

ده يبقى صالح .. من ضهر صالح ..

و ف كل حارة .. مقام و سيد ..

لكن حارتنا .. يا وقعة سوده ..

من غير مقام ..

ولا حتى سيد ..

وايام زمان .. كان سيدنا دوه..

مجدع .. وقوة ..

وله من العبيد .. ولا الف راس ..

خلوه مقامنا ..

يسكن بيناتنا ..

نكسب بصيته ..

و الناس بسيطة ..

خلوها زيطة..

الامريكانى .. ابن العبيطة ..

صار له مقام..



طارق المملوك  

20/3/2004