PostPoems Be Artistic. Be Creative. Be Inspired!

رسالة للسيد الرئيس



مد قلبك .. و سلم ..

قلبى ممدودلك ايادى.. بتناديك ..

تقول صحابى ..

تقول ولادى .. امانة ربنا ..

صارت يا ريس  بين ايديك ..

اقول يا والدى؟..

اقول يا عمى ؟ ..

اقول يا خالى ؟ ..

قول يا ريس ما انت منا ..

من وطنا .. و الوطن عالى .. و غالى ..

احنا الوطن اللى انقهر ..

و انعدم فيه الطحين ..

مع اننا .. شوف شعبنا ..

كله ناسه م الغلابه .. المطحونين ..

بين الحجر .. وسط الرحى .. متقطعين ..

مد قلبك .. نسلم .. نبايع ..

بس شرط ..

والله بدايته شرط .. اخره نور ..

من غير ما الف  .. او حتى ادور ..

حس بينا ..

و بوجعنا .. قوم واعدنا ..

اننا ما نبات ف يوم متجرحين ..

او عريانين .. او مذلولين ..

لا مننا فينا .. ولا م اللى يسوى ..

واللى ما يسواش ..

اقول كمان .. ولا بلاش .. خلينا مرتاحين ..

مد قلبك .. اقرا احلامى الصغيرة ..

مد قلبك .. احتوى امالنا الكبيرة ..

مد قلبك .. خلى الارض  تطرح ..

خلى الخلق تفرح .. بعد حيرة ..

و المكن يزأر ف المصانع ..

و يعلى صوت الشقيانين ..



*********************



طالب .. و طالب .. و طالب ..

بس يا ريسنا مش كاتب ..

عريضة .. او حتى التماس ..

مش هارضى اى وسطه ..

اى دمغة .. او طابور طويل ..

او كلمه تهرب م المعانى ..

و تتخلق ازمة .. او التباس ..

مد قلبك جوا قلبى ..

حس نبضه ..

حس قهره ..

حس بينا .. بالغلابة ..

فريسه وقعت .. جوا جحر من الديابة ..

هى مصر ..  وطنا ؟؟؟..

ولا غابة ..؟

هى مصر يا زعيم ..

عروسة حلوة .. وانت الوكيل ..

مد ايديك .. طالب القرب منك ..

بس اوعى يكون المهر غالى ..

كل ما املك بين ايديا ..

حبى ..

عشقى ..

و قهرتى ..

كل ده من حر مالى ..

جهزوها ..

زوقوها..

زفوهالى ..



***************



جاى  طالب من ايدينك بق ميه ..

لجل يتنسى طعم المرار .. وظلم الزمن ..

ابل ريقى .. و ارتوى..

زى ارضى .. ما تتروى ..

من عرق الوطن ..

اصل الوطن زى عمرنا غالى ..

بس برضه جاى اقول الابن غالى ..

واحنا كده .. على قدنا .. راضيين ..

بس بكرة .. ايوة بكرة ..

بكرة هيتولد لابنى لجل اشوفه ..

ويا صحبة مبسوطين ..

متنعمين ..

طالب يا ريس .. ورقة .. وقلم ..

نحسب الحسبة ..

نبنى من تانى الهرم ..

من غير لا سخرة ..

ولا ذل و هوان ..

تدينى اجرة ..

اخلقلى بكرة ..

حليوة اسمر ..و بلون السنابل ..

جاى اقابل ..

حلمنا .. و جاى طالب ..

طالب يا ريس تنتخبنى .. ابقى مصرى ..

و تهادينى .. ببطاقة .. و هوية ..

عائلية ..

مفردية ..

بس يكون عليها .. مصرى ..

اصله .. اصلى ..

اثبت انى بمتلك .. نهرى ..

و بيتى ..

و غيطى .. و النيل العظيم ..

و شمسنا .. و الهوا العليل ..

طالب هوية .. تثبت يا ريس ..

انى مصري ..







طارق المملوك  

4/5/2004