PostPoems Be Artistic. Be Creative. Be Inspired!

انا جدى كان زمان مملوك .

وكان فارس .. وكان حارس .

وكان عادل .. وكان راجل .

ولاكنش من اللى باعوك .

ولا نشلوك .. ولا سجنوك .

ولاكنش من اللى خانوك .

ومع انه لا كان له رصيد .

جوا بنك من البنوك .

ولا يملك قناه فضائية .

ولا حتى حقوق ملكيه .

ولا ثروة .. ولا حتى صكوك .

لكنه صار ف يوم سلطان .

ملك الملوك .

جاب النهار .. طرد التتار .

نادى المنادى .. دق الطبول ..

وبعلو صوته .. نده يقول .

ملك الملوك .. طرد المغول .

*    *    *    *    *    *

انا جدى كان زمان مملوك .

لكنه صار ف يوم سلطان .

ملك الملوك .

لانه زمان .. كان الملوك .

زينة الرجال .. صدق اللى قال ..

اصل الملوك .. اذا حكموك .

وكانوا تمام .

ومش زى اللئام .

لا يمكن ف يوم يخونوك .

ولا يبيعوك .

وانا جدى صحيح مش عربى .

لكنه كان مسلم اكيد .

وكان غنوة جهاد و نشيد .

وكان دايما يعيد و يزيد .

يكلمنى .. ويحكيلى .

عن زمن الجدود و يقول .

يرحم زمن الجدود .

يرحم زمن الاسود .

يرحم زمن النجوم كانت تلمع ..

وكان دايما عنيه تدمع .

وكان يسمع .

عذب الكلام .. حديث .. قرآن ..

وصوته ادان .. عليه الخلق تتجمع ..

حى على الجهاد يا رجال .

اصل الزمان غير الزمان .

مع اننا عايشين فى نفس المكان ..

لان زمان .. كان زمن الملوك ..

زمن والدى ..وجدى وابوك .

كان الملوك .. حقيقى ملوك .

وانا فاكر زمان جدى .

ف يوم قالى .. وفهمنى .. وعلمنى ..

ماتزعلش اذا الخلق يوم عايروك ..

وقالولك ..

ده اللى جده كان زمان مملوك ..

اي ابنى .. مسير الخلق تتعلم ..

مسير الخلق تتكلم .

وتترحم على زمن الملوك .



طارق المملوك

8/4/2005