Author Information
صرخة جيفارا
Folder:
الشاعر/احمد فؤاد نجم جيفارا مات
جيفارا مات
آخر خبر فى الراديوهات
وفى الكنايس
وفى الجوامع
وفى الحوارى
والشوارع
وع القهاوى و ع البارات
جيفارا مات
واتمد حبل الدردشه والتعليقات
*****
مات المناضل المثال
ياميت خساره على الرجال
مات الجدع فوق مدفعه جوه الغابات
جسد نضاله بمصرعه ومن سكات
لا طبالين يفرقعوا ولااعلانات
مارأيكم دام عزكم يا أنتيكات
ياغرقانين فى المأكولات والملبوسات
يادفيانين ومولعين الدفايات
يامحفلطين ياملمعين ياجيمسينات
يابتوع نضال آخر زمن فى العوامات
مارأيكم دام عزكم
جيفارا مات
****
لا طنطنه ولاشنشنه ولا اعلامات واستعلامات
عينى عليه ساعة القضا من غير رفاق تودعه
يطاع انينه للفضا يزعق
ولا مين يسمعه
يمكن صرخ من لألم
من لسعة النار ف الحشا
يمكن ضحك او ابتسم او ارتعش او انتشى
يمكن لفظ آخر نفس
كلمة وداع لجل الجياع
يمكن وصيه للى حاضنين القضيه
فى الصراع صور كتير ملو الخيال
وألف مليون احتمال
لكن أكيد أكيد أكيد
ولاجدال جيفارا مات
موتة رجال
*****
ياشغالين ومحرومين
يامسلسلين رجلين وراس
خلاص خلاص مالكوش خلاص
غير البنادق والرصاص
دا منطق العصر السعيد
عصر الزنوج الأمريكان
الكلمه للنار والحديد
والعدل أخرس أو جبان
صرخة جيفارا ياعبيد
فى أى موطن أو مكان
مافيش بديل مافيش مناص
ياتجهزوا جيش الخلاص
ياتقولوا ع العالم خلاص
