PostPoems Be Artistic. Be Creative. Be Inspired!

ع اليادى اليادى ..



دستور يا اسيادى ..



تاهت و لقيتها ..



هنقول .. حادى بادى ..



هنقول كيلو بامية ..



سوسو ع الناحية دى ..



هنقول يا ما شالله ..



لولو ع الناحية دى..



اختارنا . اختارنا ..



آخد الحته دى ..



وانت الحته دى ..



صورة ولا كتابة ..



حكم المباراة دى ..



جايلنا محايد ..



يقرالنا جرايد ..



اصل الشيكابيكا ..



جاى هايوريكا ..



ازاى تتعرى ..



وتبيع حواريكا ..



جابلنا دساتير ..



شالوا الدسلتير ..



وجابولنا غفير ..



بعد ما عرونا ..



لبسوا البشاكير ..



قادوا البوابير ..



هايحضروا روحنا ..



ماتت وارتاحنا ..



و حدرجه بادرجه ..



ماهو طلعوا روحنا ..



بكل الاذاعات ..



نشرات .. نشرات ..



إختارنا . إختارنا ..



وإحنا اتحررنا ..



عندنا دساتير ..



وكمان امشير ..



جايلنا زكام ..



جالنا و رشحنا ..



لا لمون ينفعنا ..



ولا قوت لعيالنا ..



هنموت م الجوع ..



نرجع و نقول ..



ع اليادى اليادى ..



دستور يا اسيادى ..



ليا و لولادى ..



ولمصر الغالية ..



نطبع منشور ..



نخلق دستور ..



حقى  وانا مالى .



ده حلالى بلالى ..



ابرد و ارشح ..



و اختار لبلادى ..



هنقول حادى بادى ..



هاختار و ارشح ..



دستور يا اسيادى ..



ـــــــــــــــــــــــــــــــــــــــــــــــــــــــــــــــــ



طارق المملوك



3/3/2005