PostPoems Be Artistic. Be Creative. Be Inspired!

شوف مين بيضرب ضهر مين ..

شوف مين بيقتل شعبنا ..

قادر يخون دم الوطن ..

داير يقطع لحمنا ..

ويقول .. حكومة سفاحين ..

واحنا بيناتهم مدبوحين ..

ونقول يا اه ..

تطلع تجرَح حلقنا ..

آهين و آه .. فكي.ن رحى ..

خانقين رقاب الشقيانين ..

فكين بتنهش عضمنا ..

واحد جعان ..

والتانى عمره ما شاف شبع ..

واحنا الفريسه المدهشة ..

مليين بيوتنا قهر .. ظلم ..

ولا فيش كسوف ..

ولا فيش خشى ..

آه يا جدع ..

قلبى إنوجع ..

تعبان بيطلع ع الحيطان ..

كدر صفانا و جوَنا ..

شم النسيم .. قام و انفجع ..

يتم عيال يوم فرحهم ..

ساب الشقوق .. ضلمة و سواد ..

واخد حياته منها .. كلمة وعمل ..

قلبه سواد .. عينه سواد ..

مخلوق سواد بينا وعاش ..

لما إكتمل ..

أفكاره سمت أرضنا ..

هى السواد فى هيئته ..

ملعون إيدين مسكت سلاح ..

ملعون قلوب تزرع بدور ..

تطرح سواد ..

ملعون عقول تسهر .. تبات ..

تخطف ولاد .. تخطف رجال ..

صرخوا العيال .. كتر الصياح ..

لما طلع نور الصباح ..

ضى القمر .. راح و انقهر ..

اصل الخبر ..

مكتوب ف جرنال عمرنا ..

".. وقع الوطن .. مليان جراح .."

لما اتسلب ..

لما اتنهب ..

شقيان سنين يقرا علينا م التاريخ ..

اللى انكتب ..

ضاع كله فى لمح البصر ..

راح .. وانشطب ..

لما الديابه أهدروا دم الوطن ..

كان الزمان .. ليله سواد ..

أما المكان .. إسمه دهب ..







طارق المملوك

25/4/2006