PostPoems Be Artistic. Be Creative. Be Inspired!

عالم تانى .. لما دعانى .. قوام لبيت ..

بين السما و الميه الدافيه ..

طفت .. وشفت .. وروحت .. لقيت ..

ميه بتحضن حلم حنين ..

قمره بتسكن ضي العين ..

موجة تقرَب .. تجري عليا ..

ترمي سلامها .. تملي تحن ..

تجري لحالها .. وترجع تاني ..

تاخدني ف حضن ..

حضن يدفي ف ارض غريبه ..

ويفكرني بأحلى حبيبه ..

يمسح قهري .. يغسل قلبي ..

وارجع تاني ألملم حلمي ..

يهدى بقربي ..

عالم تاني ليا لوحدي ..

سكون ف سكون ..

وحدي بحاور كل الكون ..

قمت سألت البحرالهادي ..

هو البحر بتاعنا قريبكم ؟ ..

قالي يا عم البحر التاني مانعرفهوش ..

قلت ازاي لما انتو قرايب ..

استغربت و قلت : " عجايب " ..

ازاي عدى العمر بحاله ..وماشوفتوش ..

نفس الميه الماليه شطوطك ..

هى الميه ف بحر هناك ..

نفس الموج و الرمله الناعمه ..

نفس القمره .. نفس النجمه ..

عند الصخره بتستناك ..

كل ده كله زيه بلاقي ف بحر هناك ..

بس العالم هنا حواليا ..

بلقى ف صمته .. نبض حنين ..

ولما بروح للبحر التاني ..

بلقى فى صمته .. عذاب و انين ..

وابقى حزين مع انه واحشنى ..

ضحك البحر .. وقالي تعالى .. وقام وشوشنى ..

شوف راح اقولك سر كبير ..

بس السر يا صاحبي .. ف بير ..

اصل الميه دي ليها طباع ..

مره بينزل فيها ملايكه ..

مره بينزل فيها سباع ..

مره تحاوطك حب و فرحه ..

تنده حلمك .. تستناك ..

مره تحاوطك .. تسرق حلمك ..

شايله القهر .. بتتحداك ..

قمت سكت .. لما فهمت ..

زى طباعنا .. نلاقى بحورنا ..

نزلت دمعة عيني تئن ..

راح محاوطها .. وخدني ف حضن ..

حسيت طعم حنين جوايا ..

لما لقيت الذكرى الغايبه ..بتجري ورايا ..

قمت واخدها لحد الشط ..

خدت الورقه .. رسمت الخط ..

خط بيفصل بين بحرين ..

خط بيقسم بين حلمين ..

حلم هناك مستني ارجعله ..

وهو حزين ..

حلم جديد من عالم تاني ..

شايل بسمه ونبض حنين ..

تكبر حيرتى .. واسأل نفسي ..

رايح فين ؟؟!! ..

تقدر يوم ويجيلك قلب ..

تختار عالم م الاتنين ..





طاق المملوك

8/6/ 2006