PostPoems Be Artistic. Be Creative. Be Inspired!

-1-



تقول لِى شنو



وتقولى لِى منو ،



-2-



أنحنَا السَّاسْ



ونَحنا الرَّاسْ



ونحن الدّنيا جبناهَا



وبَنيناها..



بِويت ..فى بِويتْ



وأسْعل جدى ترهاقَا



وخلى الفَاقة .. والقَاقا



-3-



تقول لِى شنو



وتقول لِى منو ،



-4-



تَالا أبوى .. بعنخى لَزَمْ



وتَالا اللُمْ..أَبوىْ أوْلبَابْ



وأمى مهيرة بتْ عبودْ



وأخويا المهدى ..سيد السيفْ



والخلى النصارى تقيفْ



هناك ..فى القيفْ ،



-5-



تقول لِى شنو



وتقول لِى منو ،



-6-



ونحن الشينْ



ونحن الزينْ



ونحن العقبه والعتمور



ونحن القِبله .. والقرعانْ



ونحن الشانْ



ونحن النانْ



أتينا عشانْ



نسوى الدّنيا للإنسانْ



تقول لِى شنو



وتقول لِى منو ،



-8-



ونحن الصّافى



والوَافى ،



ونحن الشّافى



والكافِى ،



ونحن الزادْ



ونحن العِينه



والزِيّنه ،



ونحن – يمين – أهالينا



أهلى سرورْ



ووكَتين ينزل المستورْ



تَرَانَه النور



-9-



تقول لِى شنو



وتقول لِى منو ،



-10-



ونحن الجبنه واللبريقْ



ونحن قداحنا سَاوات ضيقْ



ونحن بيوتنا مفتوحاتْ



مَسَاىْ .. وَصباحْ



ونحن وشُوشنا



مطروحاتْ



مَسَاىْ وصباحْ



ونحن السَمحه



والقَمحه



ونحن الطله .. واللمحه ،



ونحن الصِيدْ



ونحن العيدْ ،



-11-



تقولى لِى شنو



وتقولى لِى منو ،



-12-



ونحن عُزَازْ



ونحن حَرَازْ



ونحن هَشَابْ



ونحن قُمُوحْ



ونحن تُمُورْ



ونحن عُيُوشْ



ونحن النيلْ



وَكضَاب – يا زويل – منْ قالْ



إنّك .. تانى لينا متيلْ ،



تقولى لِى شنو



وتقولى لِى منو ،



-13-



ونحن الحَجه والتوبه ،



ونحن الهِجره .. والأوبه ،



ونحن كُتَارْ



ونحن كُبَارْ ،



ونحن – يمين – جُمَال الشيلْ



ونحن – يمين –نَضِمنا قليلْ ،



-14-



تقول لِى شنو



وتقول لِى منو ،



-15-



ونحن مِحايه



نحن طِرايه



نحن فِدايه



نحن سِمايه



نحن حجاب



ونحن اللوحْ



ونحن شَرَافه فى الدنيا



ونحن كِتاب عِلمْ مفتوحْ



على كل البُلودات ..نُورْ ،



ونحن – يمين – مَداين نورْ ،



ووشنا نورْ ،



-16-



تقول لِى شنو



وتقول لِى منو ،



-17-



ونحن الحِنه والجرتقْ



ونحن الزفه والسيره ،



ونحن ..أبشرى والشبال ،



ونحن السَىْ



ونحن الوَىْ



ونحن الرقبه .. والتُمْ تُمْ



ونحن اللَمْ ..



يكون فى الدنيا ..متلنا ..لمْ



-18-



تقولى لِى شنو



وتقول لِى منو ،



-19-



ونحن العَاجْ



ونحن الصَاجْ



ونحن البوشْ



ونحن الحوشْ



ونحن الناسْ



وكتين الديارا ..يباس



وإن درت العديل والزين



تعال يا زول ،



وإن كست الكعب والشين



أرح .. يا زول



-20-



تقولى لى شنو



وتقول لى منو ،



-21-



ونحن السورْ



ونحن الحُورْ ،



ونحن بناتنا محروساتْ



ونحن وِلادنا ضُلالاتْ



ونحن أُماتنا ياهِنْ ..ديلْ ،



وجِيب ورينى زيىِّ منو ،



وتقول لِى شنو



وتقول لِى منو ،



-22-



ونحن فَزَعْ



ونحن وجَعْ



ونحن اليُمه ..واليَابَا



ونحن أريتو بالتَابَه ،



ونحن – يمين – إذا حَرّتْ ،



نخلى الواطه ..رُقَابه ،



-23-



تقولى لِى شنو



وتقولى لِى منو ،



-24-



ونحن زَغَاوه والعطرونْ



ونحن الدُونَا ..مافيشُ دونُ



ونحن وِلاد مَلك خِرتيتْ



وسَابَ الجرْ



وحجَر السِكه ،



والتاكا ،



وسيّدنا الفى الجبل ..دَاكَا



ونحن – يمين – نضِمنا كُتُرْ



وشيَتنا كُتُرْ



وأسعَل ناس كَرن والطُورْ ،



وأسعَل كَررى .. والعَتْمُورْ



وأسعل – يا جنَاَ – الخرتُومْ ،



وشوف كيفن زعلنا كُتُرْ ،



وشوف كيفن فرحنا كُتُرْ ،



أنحنا الـ للرجال خُوسَه ،



ونحن –يمين – جِنَات موسى ،



-25-



تقولى لِى شنو



وتقول لِى منو ،



-26-



ونحن الدوكه



والضُلاله ، والدونكه ،



ونحن الدانقه ،



والراكوبه ، والواطه ،



ونحن الفَكَه



والشِبكَه



ونحن الحجزه .. والعكَه ،



ونحن الجُودْ ،



ونحن أسودْ ،



ونحن النَانْ ،



حديثنا إذا أرِدتو رُطَانْ



وحين دايرين ..نسوى بَيَانْ ،



-27-



تقول لِى شنو



وتقول لِى منو ،



-28-



ونحن الخَلوهَ والدايره ،



ونحن تَكيه العايره ،



ونحن الضُّلْ ،



ونحن الكُلْ ،



ونحن سبيل غريب الليلْ ،



ونحن صباح مسافر الليلْ ،



ونحن فَنَاجرةَ الدّنيا ،



ونحن حَبَابْ



حديثنا حَبَابْ



تعال شَرِف .. وشوفنى منو ،



وتقولِى شنو ،



وتقولِى منو ،



-29-



أقيف لِسَعْ



وأقيف وأسمعْ ،



ونحن صديرى منضوم ويلْ



ونحن القَرمصيص ..بلحيلْ ،



ونحن التوبْ



ونحن الووبْ



وناس حبوبْ



وناس حَرّمْ



ونحن إذا رأينا كبيرْ



نقيف طولنا ..ونقولْ لُه ..حَبَابْ



ونديه البُكَان ..ترحابْ



ونحن. اليَانَا ديل .. يا زولْ



وتسعلنى .. وتقول لِى منو



وتقولِى شنو ،



-30-



أقيف لسعْ



وأقيف .. وأسمعْ



ونحن التَايَهْ



والاندايَهْ



والزِريعهْ



والعيزومهْ



واتفضلْ ،



ونحن الرايَه مرفُوعه



ونحن الكُلفَه مرفُوعه



ونحن حلفتَ ... مدفوعه



-31-



تقول لِى شنو



وتقول لِى منو ،



-32-



وأما عجيبْ



وأما غريبْ ،



وأقيف لسعْ



وأقيف .. وأسمعْ ،



-33-



أنا الكَعَب البسوى الويلْ



وأنا الزول السَمِحْ ..بلحيل ،



وداير ..منَِّهُمْ .. يَاتُو ..،



تقولى لِى شنو



وتقول لِى منو ،

Author's Notes/Comments: 

Me: Rudwan Abdelaal Himat

أتمنى ان تقضى اوقات جميلة هنا A'm rudwan abdelaal himat , from northern sudan (NUBI)am from the nubian clan.if you want to know more about the nubia clan you can visit the nubian page on this website.and anyone who have more information about the nubian people please sent it to me,i will be very appreciative. born on 1968, hobbies:reading,travelling,poetry  القراءه - الموسيقى - - أنمتظر منكم المساهمة فى سبيل تطوير الموقعٌرضوان  همت