PostPoems Be Artistic. Be Creative. Be Inspired!

قلت ليها وإيدى فى إيديها ..

ودمعة حزن سالتْ  

جايى منـِّك .. وماشـِّى ليك  

يا مداين غربة طالت  

ولو مدارات نجمى ضلـّتْ  

سكة السفر إستحالت  

كونى فى دربى الحقيقة  

اللَّيها ديمة مشاعرى مالتْ  

**********

قلت ليها ... وكنت راجع لى عينيها  

من أسى الزمن البسافر .. فى المشاوير العصيبة            

من متاهات الأماسى  

الفى مداها .. الحزن مضناها .. وحبيبا  

بينى لا بينك .. مزار  

لا محطات إنتظار  

ولا مواعيدك قريبة  

إنتى يا الفرح الحقيقة .. المستحيل  

هدْهِدى الصبر الجميل  

وأمسحى الحزن المخيِّم .. فى مدارات الرحيل  

**********

قلت ليها  

الحقيقة الضايعة بين قلبى .. وعيونك  

إنى لا قادر أفوتك .. لا أجيك  

وإنِّى ما عارف بدونك  

ألقى كلمة حب .. تزف البشرى فى ساعة مجيك  

إنتى عارفة .. وقلت ليك  

يانى أكتر زول بريدك  

يا نى صفوة عاشقيك  

يا نى أكتر زول بريدك  

ولسـّة بى حبك .. متيَّم .. ومبتلِى  

إلاّ ريدك .. زادنى حيرة .. على العـَلىْ  

لا مراكب القدرة ختـّنْ قلبى عندِك  

وإنتى لا قلبِك نسانى  

.. ولا عَلىْ ..