Author Information
الى مصطفى سيد احمد : أميمه حسن قاسم
Folder:
الشعر الغنائى
مامات في صوتك غير الموت
ماتت فينا خطاك السمحة
وغادرناك
ما انت الغادر درب احزانا ولا حاراتنا
ولا زغرودة بتا فينا
كتير مشتاقة ومنتظراك
يا فالا هل
وفجرا طل
وعم بهاك
وصوت صفارة القطر السافر
صرت طرف الريح في الطرحة
وصالت فيك
شبالا صامد
وصبرا جامد
وصلى ابوك يومداك
مكندك بالغنيات
متيمم ضيع فيك وضوه
وصاح الصاح انك
صورت صلاة الصالح
في سحابات الفجر العدا
واتوزع
عدد النجمة الاول
في الجنيات
يا صبح الصبح الصبحوا عليه ولادنا
صباحا اصبح من وشياتك فينا
جميع من كان تربال او اغبش
جميع من كان تربال او اغبش
طارت طيرة، من طابور الشفع
ذات صباح
طالت فيها اشواق تغريدا
طول مننا زاكي السيرة
وطول فينا الضيق الشوق اللهفة الحيرة
طلوع الروح والشمس جبيرة
خانتني القوة المدخورة
ابوي مدد
يا الله لطيف
دنيا ودستورا
فات الفوت الفوت الفايت فينا
فتات القوت
وفتناك يا دربا فك سروج
الفال فتان ومفوت درب الما بيفوت
من غير ما يموت
وفواتك فوتنا من الحجوات
وطلوع اجدادنا من التاريخ
الضم رفات الناس العملوا الدنيا حظوظ
واتفاوتنا
انا ما دسيتك من الناس
انا بس غنيتك دون احساس
لانك منك ومن ومن مني
وتاريك رقيق
عودك مسيته بحسي مساس
بس كان العود مستني
الريشة تفتح فيه مسام الصوت
السافر بينا
وما حصلنا على الايام
الرادتنا
وفضل العود شايل
غنواته ومخنوق بيك
يا عبرة قديمة
ويا موال
جوال في حسنك ما بيرتاح
يا احلى صباح
فيه اتفاكرنا
نحول كل العصب الساكن الناس
لي اطرب جنة
وناولني الريشتين يا عود
Author's Notes/Comments:
