Author Information
الحب والثورة : مشتاق ليك كتير والله
Folder:
محجوب شريــف
مشتاق ليك كتير والله
وللجيران وللحلة
كمان قطر النضال ولىَّ
وغالي عليَّ أدلىّ
محطة محطة بتذكر عيونك ونحن فى المنفى
بتذكر مناديلك خيوطها الحمرا ما صدفة
بتذكر سؤالك ليَّ متين جرح البلد يشفى
متين تضحك سما الخرطوم حبيبتنا ومتين تصفى
سؤالك كان بيعذبنا ويقربنا ويزيد ما بينا من الفة
ويزيدني حماس
وكم فى قلبي دق نحاس
وطار من عيني باقي نعاس
ونحن اتنين بنتقاسم هموم الناس
أعاهدك يا أعز الناس
أسامحك لو نسيتيني وأهنتيني وبكيتي عليَّ
لو فى يوم رميت سيفي ورفعت ايديَّ
وخنت الثورة جيت والذلة فى عينيَّ
حرام عيونك يناغموني ويرحبو بىَّ
حرام ايديك ينومن تاني فى ايديَّ
بس لكن يا ويلي يا ويلي
أقبل وين وأقول يا منو
لمن أخون صباح العين وأخون جيلي
أعاهدك يا قمر ليلي
وحاة أمنا الخرطوم
أشيل شيلي وأموت واقف على حيلي
وأقول ليك يا أعز الناس
على الوعد القديم جايين
ما بين الثورة والسكين
ثوريين حتى الموت ثوريين
وأقول ليك يا صباح العين
بنادق وين بتمنعنا العديل والزين
قنابل وين بنادق وين
