Author Information
يـــــوم شعر : هاشم صديق
Folder:
هاشم صديق يـــــوم
شعر : هاشم صديق
فتّحتَ يوم
زي كُل يوم
عاينت في وش كلُ شِي
في الغرفة
أو شارْع الحَيَاة
في الأَرِض أو في
السما.
........
وزي كل يوم
شفت الصباح
زي الصباح في يوم
أمِس
ما فيش جديد تِحت
الشَمِس.
الأرض ياها الأرِض
الظُلُم مفروض فَرِض
الملوك نفس الملوك
العِباد ضد العِباد
الصباح رغم الشمِس
متغطي بي توب السوّاد
وزي كلُ يوم
دَخّنتَ من نفس
السجاير
والشقا
وقحيت رماد.
......
وشان استريح مِن
القرف
واقدر أغيب لو ساعَة
بس
من المكان
فتشت في بطن الرسايل
والكُتب
حتى الزمان
كان القى بس خبراً
جديد
حَرفاً سعيد
برضو الكتب ياها
الكُتب
والكلام ياهو الكلام
والرسايل كُلها
مبدية بالشوق والسلام
والإحترام
والختام نفس الختام
نفس الختام
........
وغِلبت من حالي
الصعيب
وسجدت لي إبر الضلام
فجأة القرف والتِيه
وأسياف الألم
ضوّت كلام
ضوّت كلام
ضوّت كلام
لامن صَدَح اسم
البَلد
معَنى البلد
جرح البلد
جوّاي وأداني السلام
.......
آآه يا بلد
دايماً تحول بين
العصَب
والإنتحار
دايماً وجود .
دايماً نهار
دايماً نِهَار.
