Home

يا حصان فك اللجام هاشم صديق

Folder: 
هاشم صديق
يا حصان فك اللجام
هاشم صديق
يا حصان فرقع حوافرك في الظلط
أنا وانت والكارو انسجمنا مع الهوان
من غفلة في الزمن الغلط
شاقين دروب أم در أمان
كانت زماااان أم در أمان
حسي الحريق نهش الشوارع والبيوت
والميادين والدكاكين واليفط
مافيش بشر
بس الكلاب وارتال قطط
....................
شيتاً مخيف
زلزال وبس
زي التقول زارنا القدر
شيتاً غريب
شيتاً عجيب
لا بيتفهم لا بترسم
حتى الحروف أبت النقط
....................
يا كارو بس بشويش علي
أنا زول مرضرض بالصدام
أنا زول مجرح
أنا زول مقطع
بي سكاكين الكلام
أنا زول مستف بالكدر
أنا مرتين ضهري إنكسر
...................
يا كارو بس
أحميني من حمى السفر
ما داير أفوت
أخلي الشوارع والبيوت
لي (حميدتي) وللغجر
..................
وكيف يكون حتى السفر
والمطار أصبح دمار
والسكة ما عادت حديد
سرقو الفلنكات والقضيب
مافيش تذاكر أو قطر
..................
آآآآآآه يا وطن
أديني بس حبة مروة عشان أقيف
أسندني في عمر الخريف
أديني بس حق الرغيف
أديني بس ريداً سلام
أديني بس حضناً نضيف
أسندني
تكّلني
أنهرني
ما تخليني لو لحظات أنوم
أنا داير أعيش
أنا داير أقوم
أقطع رقاب (الجنجويد)
أكتب سطور سودان جديد
........................
آآآآآآه يا وطن
واااااا حرقة سما الخرطوم
يفوت كسرى يجوها الروم
واااا ضيعة ثرى أم درمان
يفوت (بشبش)
يجي (البرهان)
واااا خجلة أرض سودان
وكت اتقاسموها الدخلا والكيزان
مع الفيران
........................
يا حصان
فك اللجام
فك اللجام
فك اللجام
طير بي عديل
رجع زمان الاعتصام
حسا بس
الموت حلال
والله أبدا ما حرام
(خلي) حسي الموت حلال
والله أبدا ما حرام.
أبوظبي ٨ أكتوبر ٢٠٢٣
All reactions:

912912


 
View sudan's Full Portfolio
tags:
  • Login to post comments
  • 3 reads

©10 November 2024 - 12:27pm — sudan