Author Information
معنَى الهوى
Folder:
هاشم صديق معنَى الهوى
شعر : هاشم صديق
آخر نَفَس
كمّلتو مِن كُل السجار
في الإنتظار
وفترت من خَدَر السكُون
ومِن ذبول لون الجِدار.
...............
انتظرتِك
داير ألاقيكِ وأعَرْفِك
شان أحسِّك
وأكتر .. أكتر
موت أحبِّك
................
لو ما أطوف بِيك
الشوارِع والمقَاهي
وأمشي بيك وسْط الحوارِي
لو ما أريد نضمِك حُكاك
لوما أجادلِك
أو أخاصمِك
ومن جديد أطلب رِضاك
لو ما أقاسمِك
هَم ملايين الحيارى
وأسألِك كيف الدَبَاره
أيه يكون معنى العِباره
لو قُلت ليك: بَعرفك
أو بحسِّك
أو بحبِّك
..................
عارفه الزمن
زمن ا لغرام فوق الأرِض
زمن المتاريس والفَرِض
عارفه استقِلنا من السهر
ومِن القمر
من خرير كُل الجداوِل
وشقشقة كُل العصافير
الحنينه
عَارفه المعاني الفي الهَوى
المكتوبَه في الدنيا الجديده:
- الحب نكون
إتنين قُراب رغم الحواجزِ
والجبل
سيفين سُنان
حارسين حصاد زرع الأهل
عقلين كبار
شمسين ونار.
.................
آخر نفس كملتو
من كل السجار في الإنتظار
وفترت من خدر السكون
ومن ذبول لون الجدار
...............
إنتظرتك
إنتظرتك
رنِّي جرس الصحوة
ينفجر السكون
تلقيني صابر وداير ابدأ
عايني واقري
كلْ حوار الساعة ظاهر
في العيون.
