Author Information
رأس حربة في تيم الشعب الثوري الغالي شعر : هاشم صديق
Folder:
هاشم صديق رأس حربة في تيم الشعب الثوري الغالي
شعر : هاشم صديق
(1)
التكوين
…..
اسمي ( خميس)
ود (كوة) العاتي.
كان (عجلاتي) .
وأُمي (مهيرة)
وأبوها ( بشارة)
كان (ساعاتي) .
…….
أبوي من (بارا)
وأمي اتولدت
في حِلّة غميسة
ما بتنشاف
في أي خريطة
بأي طريقة
بأي شطارة
كان بي عين
أو نضارة.
…….
أمي وأبوي
صدفة اتلاقو
في الدنيا الشاسعة
والرحمة الواسعة
في (قطر الهم)
الدرجة الرابعة.
…….
كانوا (عوايل)
في السفر الصُدفة
ملح ومُلاح
ونسة وعرفة
(تسالي) و( تُرمس)
وقهوة (بقرفة).
وفي الونسة السمحة
في القطر الزحمة
قلْب (الوالد)
حنّ .. ورفّ
وقلْب ( الوالدة)
إتخجّ وخفّ.
……..
بعد شهرين
صبحو اتنين
زوجين طيبين
إتلمو في أسرة
في بيت في (البقعة)
وسط (العرضة) .
…….
أبوي فقران
لكن بدَبارة
مهَر الوالدة
كان (سحارة) (1)
تلاتة جنيه
سعفة.. ووردة
و( فِركة) و(فردة).
تبروقة ومصحف
و(بمبر).. و (مبخر)
تربيزة يتيمة
نص دستة كبابي
كفتيرة قديمة
وكم (هبّابي)
بحبال مُنشَدة.
جابونا تلاتة
( بتّين) و (وليد)
ربّونا (بكسرة)
كسونا السُترة
شربنا اللبن
الصافي الأصلي
ما اتمطّقنا
اللبن (البُدرة)
شَبّينا كِبِرنا
فِهِمنا نَطَقَنا
وكِسْبنا القُدرة.
……..
وأنا كنت (مقرّم)
و (ود تفتيحة)
والدنيا دي كانت
طيبة فسيحة
سينما (برمبل)
باسطة (بَيَّن) (2)
(التُرماج)
حبوبة عجوبة
و(النفاج)
قصبة سُكر
و(عنكوليب)
(نبلة) قوية
و(قلوبية) (3)
شَرَك للطير .
رحلة عيد
لجزيرة توتي
أو الباقير.
شدر (كافوري)
(سواقي الحاج)
(جنينة النزهه) (4)
(زنكي اللحمة)
السوق الزحمة
و(قهوة نوري)
والدافوري
قيامة.. عجاج .
…….
أنا كنت حريف
والكورةشُراب
أحاوْر النمله
في (جُحر الضب)
وأبهدّل أجندّل
أشطر (باك)
أو (هبّاك)
أفْرشو رَرَرَب .
روضَت الكورة
بدَل مأسورها
بقت مأسورتي
(المجنونة)
(بت الكلب) .
…….
وأترقيت ( للتيم )
الأول
في (الكُتاب )
وكبرت بقيت
مفتّل و شاب.
إتنورت
عن الأوطان
وإتفتحت
علي (الاحزاب)
– (العرضة جنوب )
– ( العرضة شمال)
– ( خور ابو عنجة )
– ( بيت المال)
– ( شارع الطابية)
– ( تيم )الطاغية
– ( كار) المافيا
– (جنينة سيدي )
– سور القُبه
– (ضرايح بحري)
– (شرايف بري )
– رافع الراية
– ( تيم القعده)
والإندايه .
– ناس شاشاما
نادي شليل
– ( الحوليه )
دَقَ النوبه
في حمد النيل.
-(السامراب )
نادي ( الكاب)
……. والخ
والخ بخّا بخ
في العجن .. اللخ .
…….
ولأني حريف
وود لعّاب
سكتني عيون
من باب
لي باب .
إتسجلت
في تيم مغمور
مرقت سريع
لي تيم مشهور.
والبلد أتيام
والناس أقسام .
شارع خاص
شارع عام
( أتيام ) فارعين
( أتيام ) أقزام .
أحزاب فارعين
أحزاب أعلام .
دروب وحروب
صدام وكلام .
وأنا كنت
(خميس)
ود كوه العاتي
بقيت ( موضوع )
تصفيق وشيوع
مرات ( محبوب)
أحس بسلام
ومرات (أتخاف )
تقول بعاتي .
مرات ( إخلاص
لشعار التيم )
مرات معدود
في الحال متواطي .
…….
(2)
الوعي
……
من ( تيم ) الشوف
الضيق ضِقتَ
إتأملت الحال
المايل
وشفت الناس
في خصام وقبايل.
فكيت تسجيلي
بإيدي وعقلي
وإتسجلت
في ( تيم ) الشعب
الغالي الثوري
وأنا أصلي
مصحصح
و (ود تفتيحه)
ولاعب فقري .
مرقت سريع
من(ضيق الحاره)
للميدان الواسع
دوغري.
أنا لا ( وارغو )
ولا ( إيفياني)
لا ( ود طمبل)
لا ( مساوي)
إتسجلت
بحق طعمية
(شُراب) مقدود
و( كداره ) هديه
وكيس تمباك
وإتفننت أكون
(رأس حربه)
وإتجننت عديل
في المحور)
وإتقطعت
أكون ( مسّاك )
إتراقبت كتير
بالصف
وإتكعبلت كتير
من خلف .
ولأني ( خميس )
ود ( كوه )العاتي
أقع وأقوم
كمان (سداري)
تقول عجلاتي .
( وقعت ) كتير
لكني ( وقفت)
(حاورت) دفرت
بعزم الشعب
وصلت المرمي
كم سددت
كم سجلت
كم دافعت
كم مررت .
كم قومت
نَفَس عرَاضه
مع اني مراقب
ديمه بلاعب
لاصق فيني
( كأنو قراده )
ومرات ممسوك
بي زول عتّالي
جابوهو عشاني
خصوص
من ( مالي)
شعارو الغالي
لا ( باص)
لا بَصّه
يتابع يراقب
تقول مُرسال
من (جهة مختصه).
لكني طرحتو
جمعتو .. قسمتو
جدعتو بعيد
في بره الخط
إتمدد يقنت
زي ( ضكر البط) .
……
ولأنو (الكوره)
والدنيا الصعبه
بحر ممدود
لا حد .. لا شط
إتعذّبت
في درب (الواقع)
أكتر .. وأكتر
التحكيم الفاشل
ياما شَهَر في وشي
( الكرت الاصفر)
ومره( الاحمر)
وجرايد (النَِقه)
كانت أخطر.
ألف إشاعه
وكم شماعه
سموم وحُراب
دمار وخراب .
كم سووني
بعتَ وخنتَ
أو ساومت
وإتقاعست .
(بعت قضية)
قبضت رهاب
وإتهافت عديل
لي ( والي )
أو دقيت في السر
لي ( باب )
وإتوسلت
عيون ( أرباب)
مع إني (خميس )
ود ( كوه)العاتي
( ود تفتيحة )
مصحصح وفقري.
مرقت عديل
من باب الحاره
الضَيّق ضايق
للميدان الواسع
دوغري.
فكيت تسجيلي
بإيدي وعقلي
وإتسجلت في تيم
الشعب الغالي
الثوري .
