Author Information
عشه ام حجل شعر : هاشم صديق
Folder:
هاشم صديق عشه ام حجل
شعر : هاشم صديق
قرقُوشة
يا عَشّه
أم حِجِل
مغموسة
في شاي الصباح .
شاياً مسيخ
أحمر
تقول قارصاك
عقرب
والوجع ولَعَ
وناح .
يا حليل
زمن كانوا العقارِب
في الجحور
حسه العقارب
في القصور
والنِعيم
وأزهي الرياش
مكتوبة
بي إسم الصقور .
..........
..........
أحمر مسيخ
شاييك
لا سُكر
لبن
وقرقوشة
من زمن المسيح
الدنيا حسع
ناشفة
ياعشة ام حِجِل
ماشين
علي آخر شهر
وشن كمان
طعم الشهر ؟
يتماص يفوت
بي حالو
زي لمح البصر .
.........
.........
يا حليل
زمن آخْر الشهور
ما احترنا
في شاي اللبن
ما دُخنا
لي حق المُلاح
ما جُعنا
في وكت الفطور
ما غِبنا
من رُز السحو ر
حسع نِشِف
حتي البحر
والأَرِض
وقفت تَدْور
اللمة واللُقمة
وطعم خير
الصواني
ما بجينا تاني
زمانو راح
حسع زمن
مضغ الجراح
.........
خلينا
من شاي اللبن
وكت الصباح .
........
........
عشة أم حِجِل
حِملِك تِقِل
عَشمك كِمل
وأصبح تِفل
تسعين حزب
شايلين همومك
بالكضب
ما دقّ زول
بابِك سأل
ولا حتي
زول
جابو الدرِب
وسبعين جريدة
كتيرة
زي هم القلب
ما جابو ليك
أحلام جديدة
ما زادوا فهمك
غير غباش
وحيكومة واقعة
علي الطناش .
.........
.........
عشة أم حِجِل
همك تِقل
راجلك مَرَق
يوماً صرف
حق المعاش
في السكة
إتنشل إنسرق
بالمغسة داخ
زي التقول
قلبو انحرق
وقبال يصل
ويحكي الحصل
في الحال وقع
صابو الأجل .
.........
.........
خَلاّ ليك
يا عشة
بس عالم غباش
وحق المعاش
وتسعين حزب
شايلين همومك
بالكضب
وحيكومة
مجنونة وطناش
تِتشكّ
زي ورق اللعب
سعرانة
زي خشم الكلب
شقت جنوبنا
من الشمال
حرقت قلوب
ناس الغرب
سلختنا
بي موس
الكلام
دبغتنا
بي وجع الضرِب
.........
.........
عشة أم حِجِل
حِملِك تقل
السوق جفل
رمضان وصل
ملوة بصل
وسُكر رطل
دايرات بطل .
بين المساكين
والرفوف
انتهي وودّع
زمان
شهر العسل .
........
........
تسعين حزب
يا عشة
سمونا ( الغلابة )
لاكونا
بي ضروس
الخطابة
هتفوا
( شان الشعب
بنخوض الحرابة )
غشونا
لا غَدّونا
لا عَشّونا
بس سوونا
مُركب
والسلام
باعونا
في سوق الكلام
(سوونا طُسة )
جدعونا
بس ( طُرة )
و ( كتابة ) .
........
.........
يا عشة
بس قولي
السلامة
شايفة كيف
جاية القيامة ؟!
قدامنا زي
مليون علامة .
.......
.......
عشة أم حِجِل
قالوا السؤال
بعدو الجواب
حسه السؤال
بعدو السؤال
وقالوا الحلال
ما صار حرام
حسه الحرام
أصبح حلال
جاطونا
ما سابونا
نفهم أو نشوف
عجنونا
في طين الظروف
لخمونا ما خلونا
نفرز
لي يمينّا
من الشمال .
.........
.........
تسعين حزب
رافعين يفط
ثورة ونضال
ما جابو شمساً
أو جواب
أو حتي تمرات
في جُراب
أو حلوا لُغزاً
في كتاب
إلا الكلام
بعدو الكلام
إلا الخلاف
بعدو الكتال
إلا السؤال
بعدو السؤال .
........
........
وانتي
ياعشة أم حِجِل
حِلمِك بسيط
قُراصة
بي ( دمعة عِجِل)
ومعاها بس
رُبطة فِجِل .
.......
آآآآه يا عشة
لو صبرك كِمِل
بيتك عِدِم
حتي النمل
دُخريك بس
هذا الحِجِل
لسع معنكش
في الرِجِل .
