Author Information
أذن الآذان هاشم صديق
Folder:
هاشم صديق أذن الآذان
هاشم صديق
أذن الآذان
وحَنصليكَ يا صُبح الخلاص
حَاضِر
ونفتح دفتر الأحزان
من الأول وللآخِر
ونتساءل:
منو الربحَان ؟
منو الخاسِر ؟
منو الكاتل .. منو المكتول ؟
منو القدّام ضمير الدنيا
يوم الواقعة كان موصُوم
وكان مسئول ؟
منو العمّق جذور العِزّة
جوّه الطين
وما هماهو يوم الهجره
للمجهُول ؟
منو الإتفشّى
ولّع نارو في المخزون
من المحصُول
وكان إتغشَّى
ما عاين عشان يتأمّل
العيش الملا القندول ؟
منو العسكر مع الطُغيان
منو السلّم صغارو الغول ؟
منو اللمّع نَعَل كاتِلنا
يوم كاتِلنا كان مخبول ؟
منو الغنالنا ساعْة الحاره
يا اكتوبر المحمول
علي الأكتاف
و يا اكتوبر المكتول .
**
وبعد الصحوَه و الآذان
ليكا يا شعبى
وفيكَ اقول:
مافي غيرك
لا إسم
لا رسم
لا حقيقه و لا قضيه
دربى دربك
جرحى جرحك
مجدى مجدك
عِز مسَطّر في البيارق و الهويّه
صوتي صوتك
حقي حقّك
وَعيي وَعيَك
عين بتسهر في المراكز
وقلب راكِز
وايد بِتَضغط في زناد البندقيه .
**
حبيبنا الشعب يا قادر
ويا نادر
البخونك داس كرامتو
وزى مقاتل خان قضِيتو
وباع سِلاحو وعادى رايتو
والبِعزّك و البِحبك
ما بيهَادن .. وما بلاين
حتى لو لامس نِهَايتو .
فيك يحس الإحترام
وليك منّك
لازم يعرف
إيه هوْ معنى الإلتزام .
