Author Information
ارتجاج
Folder:
من ليالى النزيف والموت امسك دماغك بين ايديك
واضحك على نفسك
لحظة خروجك كل يوم الصبح
من نص الحكايه
ودماغك متبرمجه
ع اللى انت مش عايزه
افتكر
ايام كتير عدت
وانت بتستنى
وايام كتير جايه
اسال عينيك
عن صورتك المقلوبه
ف اخر الكادر
مش واضحه للننى
تعرف بانك وهم
مش اكتر
وحتى الضحكه
مش ملكك
رجع دماغك تانى لمكانها
وحاول تقرا افكارك
ولا اقولك
عندى فكره
اخلع دماغك
واحدفها باول فرن يقابلك
ما انت مؤمن
النار لا يمكن تحرقك
انتظر لحظة خروجها
اسالها سؤال واحد
حست بايه
وهى بتغير جلدها
************
